Aizawl: ZPM chuan Mizoram sum dinhmun tha lo tak pawhin kalphung thar, mipui sorkarah hma a sawn chho hret hret chu finance changtu, Chief Minister Lalduhoma leh a thawhpuite an chhuan thu a sawi.
Nimina thuchhuah an siamah ZPM chuan Mizoram sorkarin Financial Year thara Rs vbc 900 chuang an luhpui thei tur hian hma an sawi tih a lantir chiang hle nia an ngaih thu sawiin, nikum lam khan Rs vbc 500 vel financial year hlui atang khan chhuahpui a, kumin FY tharah, nikum lama an luhpui Rs vbc 500 aiin Rs vbc 400 zeta tam an luhpui thei hian sum dinhmun tha lo viau mah se, Finance Minister Lalduhoma leh TBC Lalvenchhunga, Adv to CM (Finance & Planning) changtu leh a thawhpuite zarah hmasawnna an hmu chho ta hi lawmawm an tih thu an sawi a. A ngaihna hria finance minister an nei hi an chhuang hle tih an sawi.
ZPM chuan, “Kumin sorkar kum a tawp rual hian, pension charge lut sa zawng zawng pek fel vek hman a ni a, GPF leh MR bill pawh a lut ang ang pek fel vek a ni ta hi ropui kan ti takzet a ni,” an ti.
ZPM chuan finance Minister leh a thawhpuite zarah sum dinhmunin hma sawn hret hret mah se, sum dinhmun hi a la tha lo hle a ni tih mipuiten hre reng a, a theih ang anga sorkar sum hman kawngah inrenchem a tulziate hre nawn fo turin mipuite an ngen bawk.