UD&PA, AMC leh Central YMA tangkawp chuan thawhtanni khan faina hnatlangpui koin, veng hrang hrangin nasa takin an vengchhung faina turin hma an la a, a lawmawm hle.
Faina Hapta te, fai tura inzirtirna hrang hrangte kan lo nei tawh thin a, tuna pawl leh department tanghona hmalakna awm leh ta hi a lawmawm tak zet a, mitinin chhunzawm zel ila a tha awm e.
Faina hi a pawimawh a, fai chuan kan hrisel nge nge bawk tihte hi kan hriat hnu leh hriat tlan vek a ni chung hian kan fai mawhin, mahni in leh a vel pawh kan tifai tha peih ta mang lo zel ta mai hi chu inenfiah kan ngai tawh khawp mai.
Faina hian min tihrisel a, khawhawi hrim hrim a nawm phah bakah, nunhona thlengin a tinuam a, tuna faina hnatlangpui pawh hi a ni a tawp mai lo hian mitinin nun pui chhunzawm ila, kan in leh a vel tal hi kan kut a ni tih i hre thar hlawm ang u.
Fai tur hian engmah tih hran vak a ngai lo a, inzirtir vak lah kan ngai hek lo. Keimahni inchhungkhur atang hian bul tan ila, faina nun pui chungin mitin i thangharh teh ang u.