Aizawl: Mizoram sorkarin health care scheme thar a duan, Mizoram Universal Health Care Scheme (MUHCS) chu Thawhtanni atang khan hman tan a ni.
MUHCS hnuaia mipui nawlpui tana inziah luh theih hun chu nimin atang khan Health Sub-Centre leh Health & Wellness Centre-ah te hawn tan a ni. May 2025 thleng inziah luh hun hawn a ni.
Mizoram Universal Health Care Scheme hi March 19, 2025 khan Chief Minister Lalduhoma’n a tlangzarh a, he scheme hnuaiah hian mi nawlpui tan chhungkaw tinin kum khatah Rs. nuai 5 thleng an bill thei dawn a. Inziah luh man hi duh thlan tur chi thum a awm a. Rs. 2,500, Rs 5,000 leh Rs 10,000 mante a ni.
Sorkar hnathawkte tan a hranpaa inziah luh a ngai lo va, thla tin an pay level azirin an sum thawh zat tur erawh a inang lo. Sorkar hnathawk nghette medical bill theih zat hi chu bithliah a awm lo va. Civil Pensioner-ah pawh hian bill theih chin a inang lo va, thla tina sorkar atanga pension 20,000 aia tam late chuan Rs 1,000 an chhunglut ang a, Rs nuai 12 thleng an bill thei ang.
Pension 20,000 la tling lote chuan Rs. 500 thla tin an chhung lut ang a, Rs nuai 5 thleng an bill thei ang.
MUHCS te hi sorkar damdawi in te leh empanelled hospital-te-ah hman theih a ni ang a, sorkara inziak lut lo damdawi inah erawh hman theih a ni dawn lo.
Hetihlai hian Non-Government Hospital Association of Mizoram (NGHAM) chuan Mizoram Health Care Scheme thar MUHCS chu an zawm ve thei rih lo va. Cashless system a nih dawn avangin an tan tihngaihna a awm loah an ngai.
Sorkar hnathawk inzawmkhawm pawl, Federation of Mizoram Government Employees & Workers (FMGEW) pawhin MUHCS chu anmahni huamtir ve rih lo turin sorkar an ngen bawk.