Aizawl: All India Mahila Congress President Alka Lamba chuan tuna Mizoram sorkar hi mipuite mamawh, a bikin hmeichhiate mamawh pek kawngah a hlawhchham hlea a hriat thu a sawi.
Thawhlehni khan Lamba hian Aizawl Press Club-ah thu thar thehdarhtute kawmin tuna Mizoram sorkar hi mipuite mamawh, a bikin hmeichhiate mamawh pek kawngah a hlawhchham hle a hriat thu sawiin, “Congress sorkarna Telengana-ah chuan gas bur khat Rs 500-in mipuiten an lei thei a. Congress sorkarna tho, Karnataka-ah chuan hmeichhe tan bus chuan man free a ni,” tia sawiin, Mizoram sorkar hian hmeichhiate tan tih a nei em tih hi chief minister a la sawipui dawn niin a sawi.
BJP sorkar hian thenawm, Manipur buaina a ngaihthah tih sawiin Lamba chuan, “Prime minister-in vawi khat mah a la tlawh lo va. Manipur mipuiten prime minister leh home minister beisei thin mah se, anni chuan an beiseina chu engmah lovah an ngai a ni,” a ti.
Manipur tlangmite leh Mizoram mipuite hian inunauna an nei tih a hriat thu sawiin Lamba chuan, Congress chuan remna leh muanna an ngai pawimawh em em a, Manipur-a thil thleng pawh hi an ngai pawimawh a, remna leh muanna thleng thuai se an duh a, Rahul Gandhi pawhin vawi hnih lai a tlawh tawh tih a sawi.
Lamba chuan Mizoram hian ram dang nena inrina, Myanmar leh Bangladesh ramrite hi sorkar hian a ven that loh avangin drug nasa takin Mizoramah a lut a, hei hi sorkar hian tihngaihna a hre lo niin a sawi.
Mizoramah hian Congress party chhunga hmeichhiate tichak turin a rawn kal tih sawiin All India Mahila Congress president chuan, “Hruaitu tha tak an nei, tawnhriat an nei tha a, hma an sawn hle a ni. Mahila Congress Foundation Day, nikum September 15 khan Membership Drive kan nei tan a, mi nuaih nga laiin min zawm tawh a. Mizoram Mahila-te nen pawh darkar hnih leh a chanve lai meeting kan nei a, sum leh pai leh khawtlang inrelbawlnaah thuneihna hmeichhiaten kan neih ve dan tur te, social justice chungchang te kan sawiho a ni. Heng hi Gandhi-a chuan Bharat Jodo Yatra-ah a sawi thin kha a ni,” a ti bawk.