Chief Minister Lalduhoma chuan infiamna tam tak hi eizawnna tlak a nih tawh avangin a bei tak takte tan chuan hlawhtlin theihna, ram leh hnam chawimawina a nih thu a sawi.
Thawhlehni khan E. Lungdar Mini Sports Complex-ah Tuichangral Championship 2025 chu chief minister-in a hawng a. He hunah Sports Minister Lalnghinglova Hmar chu khualzahawm a ni.
Thu sawiin chief minister chuan kum 1970 chho atanga lo kalpui tan tawh, Tuichangral Games hian ngaihhlut a hlawh thin tih sawiin, “Mizoram a deng chhuak thin. Infiamna ngaina tak in nih avangin infiammite pawhin an chhawr,” tiin, Mizoramin Olympian pahnih chauh a neih zinga pakhat zawk chu E. Lungdar chhuak, C. Lalremsanga, archer a nih thu leh tun hnaiah professional footballer eng emaw zat an chher chhuak tawh thu a sawi.
Lalduhoma chuan infiamna tam tak hi eizawnna tlak a nih tawh avangin a bei tak takte tan chuan hlawhtlin theihna, ram leh hnam chawimawina a nih thu sawiin, “Vawiina intihsiakna bei tura lo kalte zingah pawh talent nei tha, tih tak taka beitu tam tak in awmin ka ring,” tiin, theihtawp chhuaha hlawhtlin ngei tuma bei turin a chah.
Mizo thalai tam takte ruihhlo vanga an thih zawih zawih karah Tuichangral thalaite erawh hi chu nun kawng dik lo laka fihlim tur te, zuk leh hmuam leh ruihhlo tih aia infiamna lamah an hun awlte hmang zawk tura a duh thu sawiin, chu chu rilru leh taksa tan a that bakah ram tan pawh a that thu a sawi.
Chief minister chuan sorkarin naupang talent nei thate zawn chhuaha training tha tak pea Olympic 2036-a India aiawh thei khawpa buatsaih an tum tih sawiin, “Kumin Tuichangral Games pawh hi naupang talent zawn nan kan hmang dawn a ni,” a ti.
Sports minister pawhin thu sawiin Tuichangral thalaite tana entawn tur, kum li chhunga E. Lungdar atanga Barcelona Olympic-a India aiawha inlan phak, Mizo Olympian hmasa ber, C. Lalremsanga neitu an nih thu sawiin, “He bialah hian talent a awm tih kan hria a, kan rawn zawng zel a ni. Tunah hian games buaipuituten Mizoram sorkar an sawm lut a ni lo, sorkarin tel ve hi kan rawn dil zawk a ni. Naupang talent nei thate kan rawn zawng a, nakkumah pawh kan la rawn zawng leh ang,” tiin, he games-ah hian tawp mai tum lo tur leh C. Lalremsanga anga Olympic khel thei nih tum turin infiammite a chah.
Tuichangral Games & Sports Association (TGSA) huam chhungah khaw 33 awmin kuminah hian khaw 17 an inlan dawn a. A vaiin inelna chi 15 a awm dawn bawk.