Formula 1 driver ropui, Michael Schumacher chu a chetsual avangin hun rei tak enkawl a ni tawh a, tun hnaia a dinhmun thar ber an puanzar danin German driver hi a tawng thei tawh lo a ni.
Schumacher hi December, 2013-ah khan French Alps-ah a chesual a. Vura a tawlhnaah chesualin a tluknaah hian a lu chu lungah a tauh a, nikhawhreloin a awm zui ta reng a. Damdawi inah hun rei tak an enkawl hnuin an ina enkawl chhunzawm an phalsak.
A nupui, Corinna chuan mi dang hriata a pasal dinhmun sawi chhuah vakte a duh lo hle a, mi thiamte chuan theihtawp chhuahin an enkawl chho reng a ni.
German F1 reporter lar, Felix Gorner chuan tun hnaiah Schumacher dinhmun hi a puangzar a, engtik lai pawha dimdawi taka enkawl reng a ngaih thu a sawi.
Gorner chuan, “A dinhmun hi a tha lem lo hle a, dimdawi taka enkawl chhunzawm reng a ngai a, thlahthlam theih a ni lo. Amah enkawltute kutah a innghat tak meuh a, tawng pawh a tawng thei tawh lo,” a ti.
Schumacher chhungkua chuan mi nazawng tlawhtir an remti lo a, a tam berah mi 20 bakin an hmuh theih loh thu Groner chuan a sawi a ni.
Kum 1994 leh 1995-ah khan Schumacher chu Bennetton driver niin F1 world champion a ni thei a, Ferrari chuan an hnena awm turin an thlem lut a. A tirah chuan champion theihna car an pe mai bik lo a, a hnuah erawh driver ropui a nihna a lantir nasa hle.
Ross Brawn leh Rory Byrne te nen Schumacher te chuan Ferrari chu team tha ber an nih chhohtir thei a. Kum 2000 leh 2004 inkarah khan vawi nga a champion thei a, hetiang taka dinhmun ropui hi Lewis Hamilton leh Max Verstappen te chuan an thleng thei ve lo a ni.