Aizawl: Adviser to Chief Minister Lalmuanpuia Punte chuan raltlante chungchangah ngaihtuahna sen a ngaih thu leh Aizawl to Lunglei kawngpui ATL road chu department in a chhe lai siam tha tura estimate an siam hmanga thawh phawt tura ruahman a nih thu a sawi.
Nimina ZPM General headquarters-in an party pisa-a chhung inkhawm an neihah thu sawiin Lalmuanpuia Punte chuan raltlante chungchanga a sawi a. “Eizawnna an mamawh ve vek a, ruahmanna fel tak nena enkawl an ngai a, kan mihringpuite an nih bakah kan unaute an ni a, thil duhawm lo a thlen apianga raltlante kan mawhpuh thin pawh hi a dik vek lo mai thei,” a ti.
Raltlan dawnsawn kawngah YMA-ten theihtawpa hma an lakna a chhuan thu sawiin, “Thih hnu piah lam a pawimawh ang bawkin, khawvela kan mihringpuite nen khawsak ho thiam a pawimawh hle a, politics a Pathian ram tun din a nih theih nan kan mihringpuite hmangaih kawnga tan lak hi a tul hle a ni,” a ti bawk.
ATL Road hi chief minister leh PWD minister ten an ngai pawimawh tih sawiin, “He kawng siam a nih laia a thawktuten an thawh that loh avanga an contact an tihtawpsakte khan an sum hman bâng, Rs vbc 20 fixed deposit-a an lo dah chu, Lunglei West bialtu MLA Pu T. Lalhlimpuia’n a hai chhuak a, Rs vbc 90 dawn lai mai a lo tling hman tawh a. Chutih laiin, Lunglei Circle Thenzawl to Lunglei pum pui siam nan chuan a tlem a, a chhe lai thawm that nan erawh a tam leh bawk si,” tiin, department-in a chhe lai siam tha turin estimate an siam, Rs vbc 40 vel hmanga thawh phawt tura ruahman a nih tak thu a sawi.