Aizawl: Supply Minister B Lalchhanzova’n nimin khan Mamit tlawhin, Ministry of Petroleum & Natural Gas bul tuma Northeast Gas Grid Project hnuaia Panisagar (Tripura) atanga Sihmui inkara gas pipeline phum hna thawh mek a enfiah a; Indradhanush Gas Grid Limited (IGGL) hotute, Tripura Natural Gas Corporation Limited (TNGCL) hotute leh Mamit khawtlang hruaitute nen an inkawm.
Mamit DC Conference Hall-a an inkawmnaah TNGCL leh IGGL hotute sawi danin, he project km 127 a thui niin, Mamit district-ah km 100 awmin, Aizawl-ah km 4 niin a bak chu Tripura-ah a awm a ni. A project hi Rs vbc 491 niin, March, 2026 a zawh hman tura duan a ni.
IGGL-in gas pipeline an phum zawhah TNGCL-in ei rawngbawlna tur natural gas chu in lamah tui connection anga herh haw theihin an sem dawn bakah, lirtheiin a hman chi CNG chu station eng emaw zatah pekchhuah turin an ruahman bawk ang.
IGGL hotute chuan Minister B Lalchhanzova chu Luangpawla chainage 87-a pipeline phum mek chu an enpui bawk.
Minister B Lalchhanzova chuan he project tihhlawhtlin hun a nghahlelh thu sawiin, hei hian ei rawangbawlna leh lirtheia hman tur gas te Tripura atanga pipeline-a a lo thlen hunah chuan mahni inah gas herh hawn theih ani ang a, hei hian nasa takin khawsak a tih awlsam bakah mipui tan energy security a pek tur thu a sawi.
Mizoramin hmasawnna hna a thawhte hi a ram neitu Mizo mipui ten an hriat tur ang angte chiang taka an hriat hi an chanvo a nih thu leh hriat ngei pawh tum thin turin khawtlang hruaitu a chah a. An hriat duh apiangte hrilhfiah thin turin IGGL, TNGCL leh Mamit DC te chu a chah bawk.