Chanmari Local Council leh branch YMA-ten thuchhuah intawm siamin an veng chhung mipuite chu foreigner raltlante dawr luahtir lo tura an hriattir bakah veng chhunga foreigner raltlan awmte chhiarpui an nei dawn thu an tar lang.
Nimina an thuchhuaha an tar lan danin Chanmari Veng chhunga foreigner raltlan awm zawng zawngte chuan Mizoram sorkar siam temporary ID neih vek tur a ni a. A la nei loten a rang lamin local council hnenah form dil theih a ni a. Local council leh branch YMA tangkawp chuan veng chhunga foreigner raltlan awmte chhiarpui a nei dawn a. Veng chhung mipuite leh in neitu zawng zawngte thlawp tlat turin an ngen.
In luah chungchangah local council/YMA hriatpuina tel lovin foreigner raltlante in luahtir lo tur leh local council/YMA pem lehkha nei lote in luahtir lo turin an inhriattir bawk.
Sumdawnna chungchangah foreigner raltlante veng chhung mipuiten dawr luahtir lo tur te, hnam dang sumdawngte inremsiama Mizo hming hawhtir lo turin mipuite an inhriattir a. Hetiang ti hria an awm a nih chuan local council/YMA hriattir turin an ngen a. Remchang hmasa berah local council leh YMA ten endikna hun an nei dawn thu an tar lang bawk.