Aizawl: MNF President Zoramthanga chuan tun hnaiah Union Home Minister Amit Shah nen an inkawm thu leh MNF sorkar siam leh ngei tura fuihna a dawn thu a sawi.
Thawhtannia Mizo Hnam Run chhung inkhawmah thu sawiin MNF president chuan March 15, 2025 khan Union Home Minister Shah chu Mizoramah lo kalin, hemi ni hian union home ministry official-te ruahmannain inkawmna hun pawimawh tak an neih thu a sawi.
Shah nen an inkawm chhan ber sawiin Zoramthanga chuan, central-a Congress sorkar laiin, Burma rama remna a awm theihna tura palai hna a thawh dan a hrilh tih sawiin, “Burma underground intelkhawmin federal state siam an duh a, a leh lamah Burma sipai sorkar pawhin federal sorkar siam an remti ve bawk a. Rangoon, Bangkok-ah vawi tam ka kal hnuah India sorkarah ka report a, anni’n Pu Ajit Doval-a (National Security Advisor of India) nen min tir ta a, kan hlawhtlin teuh hle tih thu ka hrilh,” a ti.
“India rama exposure nei tura phur taka ruahmanna siama hmalakna kan neih laiin, Burma election-ah Aung San Suu Kyi a sorkar ta a, hmalakna a tawp zui ta a ni. Tun dinhmunah chuan sipai sorkar hnuaiah thil a khirh ta em em a ni. Amaherawhchu, hmana exposure neih an duh dan leh India sorkar pawhin hmachhawpa a lo neih tawhte kha ka sawi a. Hei hi home minister chuan a ngai thutak hle a ni,” a ti bawk.
Chief minister hlui, Zoramthanga chuan Vairengte issue bakah central BJP sorkar nena an inlaichinna a that tawk loh avangin BJP chuan ZPM an awn ta tih sawiin tuna Lalduhoma sorkarah hian BJP-ten tel ve an inbeisei dan te, a hnuah MP inthlana ZPM chak kha khatih laia BJP-in central-a sorkar siam tura MP 272 an mamawh lai tak a ni. Mizoram Lok Sabha MP pakhat chauh pawh a pawimawh em em lai a ni a. Khati chunga BJP tan an pe thei lo kha, an boruak a tha ta lo takzet tih a sawi.
Union home minister-in ZPM sorkar a hmuh dan chungchang a zawt ngun viau tih sawiin, “Kei chuan thu danga chhang lovin, ‘ZPM sorkar chu an la tharlam a, nakinah thil an zir zel anga an la hre chhawm ve mai ang,’ ti bakin ka chhang lo,” a ti a. Shah chuan MNF chu sorkar leh ngei se a duhsak thu leh grassroot atanga tan la nasa turin khunkhan takin a fuih tih a sawi. “Sorkarna siam tura heti taka min duhsaktu hi ka la tawng ngai miah lo,” Zoramthanga chuan a ti.