- Kima Mivam
Mizote hi zai ngaina hnam kan ni tih chu kan pawm tlang vekin a rinawm a. chutih lai chuan zaipawl kan neihna a rei tawh ang ai hian Khawvel puma lar khawp chu sawi loh India ram puma lar khawp pawh kan la nei lo hi chu kan inenlet a tul viau a tih theih ang. Chuti ang a lar si lo chu Zaipawl hrang hrang din nan leh an chet velna atan kan sum leh tha senral tam zia chu kan ngaihtuah leh miah lo em ni chu aw, a tih theih.
- Synod Zaipawl
Synod Zaipawl sawi hmasa ta ila. Kum 2023 CKTP chuan Synod Choir chetvelna atan budget an duan chu Rs 13,10,000 (nuai 13 leh Sing 1) a ni a. Hetah hian Synod Choir zinna, Hla zirna, Uniform leh Music Video siamna te telh an ni a. Hman zat erawh chu Rs 7,24,264 (Nuai 7 Sing 2 Sang 4 leh za hnih sawm ruk pali) a ni a, a tlem viau lo a, Wales ramah zin phei se chuan hei ai hian an sum hman hi a sang daihin a rinawm. Tin, Lunglei lamah Presbyterian Choir a ding bawk a, Synod Choir senso chanve an seng turah ring chhin ta ila, Rs 3,62,132 a ni ang. Tin, An din tharna la rei vak lo tho, Synod Mission Choir ala awm bawk. Presbyterian Choir nen hian an sum senral a inthlau lo torah ngai ila. Rs 3,62,132 angin chhut sak ve mai ila. Chuti a nih chuan kum khat chhunga Synod levela Zaipawla sum senral chu Rs 14,48,528 (Nuai 14 sing 4 sang 8 leh zanga sawmhnih pariat) a ni ang.
- Pastor Bial tin Zaipawl
Pastor Bial zaipawl hi bial tinin kan nei thei deuh vek bawk a, Synod hnuaiah Bial 223 vel a awm. Pastor bial tin deuh thawah hian sum kal tamna ber leh budget kan dah san ber chu Bial zaipawl rawngbawlna hi a ni ang. Aizawla Pastor Bial pakhat chuan Rs 1,50,000 (nuai 1+) vel zel kum tin an seng ral angin a chhut theih bawk ang, chuti a nih chuan bial 200 chuan kum khat chhungin Rs3,00,00,000 vel an seng ral ang. (Bial tinin Zaipawl an neih loh vangin bial 200 anga chhut a ni.) Tin, Hla zirnaah ei leh in tlem a zawng a kal ral a, kum khat chhunga an tha sen nen han belhkhawm chuan a tlem viau lo ang. Hei chu a chhut peihin chhut tawh se la.
- Kohhran tin Zaipawl
Kohhran Zaipawl hi Kohhran tinin kan nei bawk a, tun hma chuan sum sengso lem lovin an zai mai thin fo ang a, mahse, tunhnaiah chuan Zaipawl tura hla zir tam zawkah hian thingpui in an intihhmuh ta viau a, Refreshment ah hian tum khat hla zir ah Rs 300 vel hisap sak ta ila, average a lakin thla khatah vawi 3 zir thin angin chhut ila, (a chhan chu zir loh lai deuh te a awm ang a) kum khat chhunga hla zir tum 36 refreshment manah Rs 10,800 a ni ang. Synod hnuaia Kohhran zat hi 892 vel a ni ang, (Pastor bial 223 ah chuan bial khata kohhran 4 vel zel awm ang ni ta se, 223×4= 892) chung Kohhrante chuan zaipawl refreshment bika an sum hman ral zat belhkhawm chu Rs 96,33,600 (Nuai 96+) a ni ang. A tlem lem lo khawp mai.
Tichuan, Zaipawl atana Synod hnuaia insensona zawng zawng belhkhawm chu Rs 1,16,44,260 (nuai 116+) a ni daih ang. Zaipawl ropui tak neihna tham sum chu kan seng ral lo maw? Mahse, tinge Zaipawl ropui kan neih hleihtheih loh le, Mizoram chhunga lar bak kan la awm lo si a ni lo’m ni?. Tuna mi khi kum khata senral a ni a, kum 20 chuangah phei chuan kan senso hi turu tak a ni. Kan la sengso ngam zel ang em? Kohhran leh a chunga chengte hian kan ngaihtuah loh lam tak a nih a rinawm.
- Synod hnuai ni velo Zaipawlte
Hei hi Synod hnuaia Kohhran bik ten an senral chauh a la ni a, Tunhnaiah chuan Para Church leh Pawl eng emaw ten Zaipawl an din leh mek bawk a, sum eng emaw zat a kal ral nual bawk ang. Anni ho hi Bial zawipawl tlukin hla an zir a, an zin kual nasa bawk, chuti a nih chuan an sum senral pawh a inzat thuak awm e.
Synod hnuai lovah Kohhran tam tak kan awm a, Zaipawl dang thahnem tak a awm mek bawk tihna a nih chu. Chung kohhran pawl dangin zaipawl atan sum an sen ral hi Synod hnuaia Bial zaipawl belhkhawm sum senral aiin a tlem a rinawm loh, mahse, a in ang turin chhhut sak ila, Mizoramin Zaipawl atana kan sum senral a rawn lang uarh thei ang a, Rs 35+ Cr. (Vaibelchhe 35+) vel hi kum khatah Zaipawl tana kan sum luang ral a ni tihna a nih chu. Hna ropui ava thawk thei dawn em!
Zaipawl Kum khata sum hman ral zat (Rs)
- Synod Choir 7,24,264
- Presbyterian Choir Lunglei 3,62,132
- Mission Choir 3,62,132
- Bial Zaipawl belhkhawm 3,00,00,000
- Kohhran Zaipawl Belhkhawm 96,33,600
- Para churches 96,33,600
- Other Churches 3,00,00,000
TOTAL 35,07,15,728
Tuna kan sum senralah khian Zaipawl member ten kan tha sen a tel ve lo a ni. Zaipawl hla zir nana thalai te hun khawhral hi mi pakhat tan darkar khata Rs50 lek anga chhut pawhin a thahnem tham khawp ang le!
- Kan thalai rual mangang tan sum seng zawk ila?
Heta kan sum senral tarlan hian tum a nei a, chu chu Zaipawla sum seng vaka thalai tam tak sual kawng zawh leh ruihhlo bawiha tang kan ngah si hi a inhmeh lo em em a ni. Kan thian leh unaute ruihhlo bawihah an tang mek a, kan khawtlang nun a thothang tha thei lova, Thalai rual hna neilovin an rum tlawk tlawk a, nupui pasal nei tha ngam mang lovin an tal vel huat huat mek a. nu leh pa an rum mek a ni. Chutih lai chuan Sum thahnem tak chu Zaipawl neih nan kan lo pe reng a lo ni a. Zaipawl leh hla zir vanga piang thar sawi tur an vang si! Ruihhlo ngai te pual hian camping mai nilo, home leh recreation centre te after care din te hi ngaihtuah zawk ila, a nih loh pawhin Zaipawla kan sum sen chanve tal hi heti lamah hian hmang ila, a tha zawk lo maw?