Kum 2012 khan Saif Ali Khan nen an innei a, a tir lamah chuan a duh thak bik lova, film an chandunna hmun hnihah biahthu a hlan chu vawihnih a hnial fithla niin, Bollywood star Kareena Kapoor chuan a sawi.
A tirah tak chuan Kareena hian Saif hi a pasal tur atan a hual ngai lova, a ngaihtuahnaah a lut hek lo. 2008-a Tashan an chandun khan boruak mak danglam tak an inkarah a awm tan. Mahse, Saif hian chuti maiin awlsam takin Kareena hmangaih letna hi a dawng bik lova, a bei ve fat fat nia hriat a ni.
Pinkvilla nena interview-ah Kareena chuan Greece rama Tashan an chan tumin a vawikhat nan nupui atan a sawm nia sawiin, “Nia, min sawm ngei a lawm. ‘Kan innei thei ang em’ a ti a, Greece-ah a sawi hnu hian Ladakh-ah a sawi nawn leh a, chumi tum pawh chuan, ‘Ka hre lo. Ka hrechiang lo che, ‘ tiin ka chhâng a, ka hnial fithla,” a ti.
Pasal nei a, chhungkua a din hnuah lemchan khawvel chhuahsan mai tumna a nei ngai lo tih pawh sawiin, “Ka nuna duhthlanna tha ber siamin ka inhria. Ka eizawnna hi mi mal nun nen a kalkawp thiang lova, chumi ah chuan ka chiang hle. Hmangaih neih a pawina a awm lova, thihna a ni hek lo.
Mahse, Saif hnenah chiang takin ka hrilh a, ‘En teh, ka eizawnna hi ka chhunzawm zel ang,’ ka ti a, ani pawhin ‘Tehreng mai’ tia min chhan hnu-ah ka rilru ka pe ve thei chauh a ni,” a ti.
Kareena leh Saif te hi LOC Kargil (2003), Omkara (2006), Tashan (2008), Kurbaan (2009) leh Agent Vinod (2012) ah te khan an lo thawkdun tawh a ni.