Aizawl: Govt. T. Romana College chuan nimin khan North Eastern Region (NER)-a NCC Best College leh Best Cadet lawmman an dawn lawmna hun an college-ah an buatsaih a. He hun hi Larsap Gen. Vijay Kumar Singh-a’n a hmanpui.
Larsap Gen. Singh chuan NCC cadets hmingthate hnenah lawmman hlanin thu a sawi a. Zirlaite chu institution tha a kal thei an nih avanga lawm thiam tur leh an hma lam hun atana an inbuatsaihna turah theihtawp chhuah turin a chah a. An hma lam hunah Mizoram chhung mai ni lo, hmarchhak leh India ram zau zawka college leh Mizo hnam tihmingthatu ni zel turin a fuih bawk.
Govt. T. Romana College-a NCC te hi 1st Mizo Battalion NCC te an ni a, kum 2024-2025 chhunga North Eastern Region (NER)-ah Mizoram (Silchar telin) chhunga NCC Best College atan thlan an ni a, an zirlai Jacksy Lalhlimsangi JUO chu Best Cadet atan thlan a ni bawk.
Lawmman te hi March 25, 2025 khan Guwahati ah sem a ni a, an College Vice Principal R. Lalremliana’n a dawng a ni.