Aizawl: April 26, 2025-a ‘Aizawl International Half Marathon 2025 (AIHM)’ neih turah tlan tura inziak lut mi 200 chuang an awm tawh.
Nimin khan Sports Minister Lalnghinglova Hmar hovin a pisa-ah nimin khan ‘Aizawl International Half Marathon’ neih tur chungchang an sawi ho a. Minister chuan AIHM hi Mizoram sorkar, Sports department leh Innovations India tangkawpin an buatsaih niin, Athletics Federation of India pawmpui a ni a, kumdangah pawh neih chhunzawm zel tum thu a sawi a. Mizoram Larsap General Vijay Kumar Singh leh Chief Minister Lalduhoma te chu Chief Patron niin an phurpui hle tih a sawi.
Lalnghinglova Hmar chuan, “Intlansiak a nih piahlamah thalaite hriselna leh fitness-a hmasawnna tur leh ram dang leh hnam dang mithmuha Mizoram mawina pho chhuak tura ruahman a ni a. Tourism pawhin hma sawn phah turah kan ngai,” a ti.
Thutkhawma tar lan a nih danin tlan tura inziak lut 200 chuang an awm tawh a. Kenyan runner mi panga bakah Services atangin mi eng emaw zat an tel dawn tih a chiang tawh bawk.
Aizawl International Half Marathon hi Rajiv Gandhi Stadium atanga tlan chhuah tur a ni a. Category pathum – km 21.1, km 10 leh km 5 – awmin, a tawpna pawh RG Stadium-ah tho a ni dawn a ni.