Aizawl: Land Revenue & Settlement (LR&S) department changtu minister, B Lalchhanzova chuan huaisen taka thil dik lo an dodal ngam nan amah ngei pawh dem kai lo tura kut faia awm a tum thu a sawi.
Mizoram Survey & Land Record Service Association (MISLARSA) khawmpui nimina LR&S Directorate-a a hmanpuinaah thu sawiin B Lalchhanzova chuan revenue department chu ram inrelbawlnaa department pawimawh berte zinga mi a nih thu a sawi a. Revenue inrelbawlna chak lohna leh that lohna ram a changkan theih loh thu sawiin, hemi kawngah hian Lalduhoma kaihruai ZPM sorkar chuan revenue department chu a pawimawhna a hmu thiam a, state tana sum thawkchhuaktu an nih bawk avangin thuam chak tum mek a nih thu a sawi.
Revenue minister chuan, “Revenue department hi zahawm, ram chhiat thata mawhphurtu kan ni a. Kan inenkawl danah hma lam eng kan neih avangin thil tihfel a awlsam tan hle,” tin, tun atang chuan anmahni dawrtute hriat theih hial turin an hmelah pawh phurna lantir tur leh department dawr nuam tak nih tum turin kalkhawmte a chah.
B. Lalchhanzova chuan chuan thawktute chu thlemna leh vaunate an dawn thin a rin thu sawiin, thil diklo chu huaisen taka an dodal ngam nan amah ngei pawh dem kai lo tura kut faia awm a tum chu, revenue department-a thawk zawng zawngte phurna leh huaisenna petu ni thei se a duh thu a sawi bawk.