Aizawl: MPCC President Lal Thanzara chuan ZPM sorkar chu a inzawrhna anga ti thei si lovin kuthnathawktute harsatna thlentu smuggling thil, mipui hriat lohin an lilam mekah a puh.
Nilaini khan Hachhek bial chhunga khaw hrang hranga Congress party mite a kawmnaah Lal Thanzara chuan, “Mizoram mipuiin ZPM party enchhin an chak a, hei hi Congress a sorkar lehna tura kawng min sah kuak sakna niin a lang a. Enchhin sorkarin mipui beisei a phak lo nasa hle a, hei hian Congress party Mizoram tana a lo thatzia tichiangtu leh fiahtu a ni,” a ti.
Lal Thanzara chuan tawngkam dengkhawng taka ‘Congress Bhawan ka lilam dawn’ titu chuan, a inzawrhna anga ti thei si lovin kuthnathawktute harsatna thlentu smuggling thil, mipui hriat lohin an lilam mek tih a sawi a. Kuhva lang lovin thla a lak theih loh tih khawpin Hachhek tlangdungah NLUP chingtute an hlawhtling a, dinhmun nuam takah an din phah a ni. Mahse kuhva tawlh ruk hmangin MNF leh ZPM sorkarin a tihchhiat sak a, a lungchhiatthlak hle tih a sawi.
Congress a sorkar loh chuan hnam hnufual leh tlem zawkte an him lo tih sawiin, “Mipuiah sum lengvak a tlem a, ruihhlo ti leh ruihhlo zawrh a hluar a, khawtlang nun a him lo a, Congress party hi Mizoram mamawh chhanna a ni,” tiin MPCC President chuan a sawi a. Congress party chu miretheite lamtang a nih thu leh Mizoram, Mizo hnam leh sakhaw tan niin, ZPM leh MNF party ruahmannaah khawpuiah mi retheite leh thingtlang mite an tel lo chu kuthnathawktute tan mangchhia an nih thu a sawi.