April 26, 2025-a Aizawl International Half Marathon 2025 (AIHM2025) neih turah nimin thleng khan hriat theih chinah tel tur mi 500 chuang an inziak lut tawh.
Nilaini khan Sports Minister Lalnghinglova Hmar chuan Conference Hall, Directorate of Sports & Youth Services-ah AIHM2025 lo awm tur chungchangah thu thar thehdarhtute a kawm a. Hemi pual hian official AIHM2025 T-shirt a tlangzarh nghal.
Sports minister chuan AIHM hi intlansiak a nih piah lamah thalaite hriselna leh fitness-a hmasawnna tur leh ram dang leh hnam dang mithmuha Mizoram mawina pho chhuak tura ruahman a nih bakah, khawvel pum huap pawha Mizoram chu marathon map-a hmun dangte zinga tel ve tumna avanga buatsaih a nih thu a sawi a. Kuminah a vawi khatna atana buatsaih a, kum dangah pawh changtlung zawka buatsaih tum a nih thu a sawi.
AIHM2025 kalphungah Athletics Federation of India (AFI) hriatpui leh pawmpuina hnuaia buatsaih a ni dawn tih sawiin Lalnghinglova Hmar chuan, “AFI hian tlankawng thui zawngte an endik dawn bakah engkim official-in an record vek dawn a. Tun tumah pawh hian world record emaw, India record emaw, lo awm sate thai chhiaa record thar siam an awm chuan AFI-in an chhinchhiah vek dawn a ni,” a ti.
Marathon buatsaih turah hian Kenya atang pawhin runner paruk an beisei zet hnuah VISA lamah buaina an neih avangin an dinhmun tihchian theih a la nih loh thu leh tel ngei tura an buaipui reng thu a sawi bawk.
Sports minister chuan intihsiakna hi hlawm thumah then niin Half Marathon – km 20.1-a thui te, Open Race – km 10-a thui bakah km 5-a thui Fun Race te a awm dawn tih a sawi a. Intihsiakna hlawm thum bakah km 5-a thui naupang kum 10-15 inkarte tan buatsaih a nih tur thu a sawi a. Intihsiakna hlawm tinah mipa leh hmeichhe tan lawmman siam a nih bakah mipa leh hmeichhia bika pakhatnate chu a thlawnin Vietnam an fan theihna tur buatsaih a nih thu leh lawmmanah Rs nuai 10 sem chhuah a nih tur thu a sawi bawk.
Lalnghinglova Hmar chuan he intihsiaknaa inziah luh tumte tan, India khua leh tui tan Rs 799 chawiin a inziah luh theih a, foreigner tan US dollar 30 chawi a ngai thung a. College leh sikul zirlaite chu an student ID hmangin Rs 99 chauh chawiin an inziak lut thei tih sawiin, “He marathon-a tel duh, sum leh pai lama harsatna nei an awm anih chuan kan lo buaipui thei ang,” a ti.
Thu thar thehdarhtute zawhna an chhan danin, nimin thleng khan hriat theih chinah AIHM-a tel tur hian mi 500 vel an inziak lut tawh a. Chung zingah chuan Mizoram pawn state 10 atanga inziak lut an awm tawh a, heng zingah Railways, Assam Regiment, Army leh Paramilitary force runner-te pawh an tel.
- Thu sawi dangte:
- Mizoram sorkar Sports & Youth Services Department, Athletic Federation of India leh Innovations India Pvt. Ltd. te tangkawp buatsaih a ni.
- He intihsiaknaa tel duh te tan April 24, zanlai dar 12 thleng inziahluhna hun hawn a ni.
- Intlansiak hi Rajiv Gandhi Stadium leh Silaimual inkara a ni dawn a, a hun chhung hian helai kawngpui hi khar a ni dawn.
- Half Marathon (21.1km) darkar thum chhunga thleng te tan Finishers Medal sem chhuah tur a ni dawn a, thlan thleng zawng zawng te hian ni 21 chhungin inziahluhna website atangin Certificate an download thei dawn bawk.
- Mizoram Larsap General Vijay Kumar Singh leh Chief Minister Lalduhoma te chu Chief Patron an ni.