Aizawl: State TB Officer Dr Zochhuanawmi kaihhruaiin nimin khan Multi Drug Resistant TB (MDR-TB) natna enkawl nana damdawi siam thar, BPaLM chungchang leh TB Preventive Therapy chungchangah NTEP hnuaia District TB officer leh thawktuten training an nei.
CMO West Dr. Chama Hall-a hun hmanah Dr. Vanzarliana, MO, State TB Cell chuan hemi chungchang hi a zirtir a ni.
Health dept tar lan danin, BPaLM hi damdawi hrang hrang pali ei chi – Bedaquiline, Pretomanid, Linezolid, Moxifloxacin inpawlh niin, MDR-TB natna enkawl nana damdawi siam thar a ni a. Union Health Ministry chuan tunah a kalpui mek a ni. Hetah hian TB damdawi thar Pretomanid hman a ni bawk.
MDR-TB damdawi hman pangngai hi kum hnih dawn ei a ni a. He damdawi combination thar BPaLM hi chu thla ruk chhung ei a ni a. A damna rate (success rate) pawh a sang hle a. MDR-TB damdawi hman pangngai aiin a that zawk bakah, ei chhung a reilo zawk dawn a. Chubakah, side effect nasa awm thin pawh he damdawi tharah chuan a awm tlem zawk tura ngaih a ni.
MDR-TB damdawi hi India rama MDR-TB damlo mi 75,000 vel ten an chhawr tangkai dawn nia sawi a ni. Mizoramah pawh MDR-TB enkawl mi 150 vel an awm a ni.