Aizawl: Mizoram Poor Federation (MPF) chuan Mizoram sorkarin a kalpui mek, Mizoram Universal Health Care Scheme (MUHCS) zawm tura ngenna kawng zawh an inhuam thu an sawi.
Nimin khan Aizawl Press Club-ah thu thar thehdarhtute kawmin MPF hruaitute chuan Health Minister Lalrinpuii hmalaknain MUHCS hman tan a ni ta tih sawiin MUCHS-ah chuan damdawi in an thlenin pawisa sen ngai lovin, thi emaw, dam emawa an chhuah pawhin an bill chu sorkarin a peksak dawn avangin mi rethei leh mi nawlpui tan a hahdamthlakin a thlamuanthlak tih an sawi.
MPF chuan kum nga chhung chauh atana thlan MLA-te pawhin an thla tin hlawh atanga health care atan Rs.1,500 an thawh dawn laiin ram budget atanga zaa 82 zet an hlawh leh inrelbawlna atan hmangtu sorkar hnathawkten an inenkawlna tur, an hlawh atanga thla tin sorkarin a cut-sak hi state hausa zawka thawkte pawhin an cut laia an rilru a na hi chu mahni chauh invulh nia an hriat thu an sawi.
MUHCS zawm ve lo non-government hospital chungchang sawiin MPF hruaitute chuan VC 13-a public meeting-ah MUHCS zawm ve tura ngenna kawng zawh pawh a tul chuan Aizawl-ah neih tha an tih thu an sawi a. ‘MUHCS awareness an neih atanga mi rethei/mipui hmakhua ngaia Mizoram non-government hospital zingah MUHCS la zawm lote hi zawm vek turin kan ngen takzet a ni’ tia resolution an pass thu an sawi bawk.