MZP Hqrs Lunglei-in an lo ruahman lawk tawh angin Aizawl-Thenzawl-Lunglei (ATL) road, Pukpui daiah lirthei lut leh chhuak tur nimin zing dar 7 atangin an dang tan a. Vawiin zing atangin Hrangchalkawn lamah pawh an dang tan dawn.
MZP Hqrs Lunglei hruaitute chuan an lo ruahman lawk tawh angin ATL road, Kanghmun South atanga Pukpui chin siamna tur sum Mizoram sorkarin a pawt peng nia an hriat avang leh sum pawh pen hi hnukkir tura ni 15 chhung sorkar an nghah hnuah an duh ang chhanna sorkar atanga an hmuh loh avangin lirthei lut leh chhuak turte tiam chin awm lovin an dang tan.
MZP Hqrs Lunglei hruaitute chuan lirthei lut chhuak tur an dan hnuah an beisei ang sorkar atanga chhanna an hmu lawk lo a nih chuan a tul angin Hrangchalkawn lamah pawh vawiin zing atangin lirthei an dang tan dawn tih an sawi.
The Zozam Times thudawn danin, nimin tlai dar 5 thleng khan lirthei an danna paltlang luih tum an awm lo va, magistrate leh police lam duty awmin MZP, MSU hruaitute bakah anmahni thlawptu pawl hrang hrang aiawhte an duty a. Aizawl lam kal maxi cab service an kal loh bakah lirthei veivak hmuh tur a awm meuh lo. Damlohna avanga kaltlang ngai, doctor lehkha neite erawh kaltlangtir an ni.
Kawng an dan tan veleh inkhawm tawi neih niin he hunah hian MZP Hqrs., Lunglei President Johan Lalhmangaiha’n thu sawiin, sorkarin he kawng siamna tur Rs vbc 90.69 dah let se an duh ber a nih thu leh kawng siamna tur a daih lohna pawh hi hnawh khat se an duh tih a sawi a. “Thusawi mai maiah MZP chu a lungawi dawn lo va, a tawp thlengin kan tang zel dawn a ni,” a ti.
He hunah hian MSU Regional Hqrs President Lalthangliana, Chhimbial Chhantu aiawhin Dengsailovi bakah, ZDU Sub. Hqtrs, Lunglei leh Maxicab Association aiawhten thu an sawi a. Kalkawmte chuan ‘ATL road siamna tur sum Rs vbc 90.69 atanga an pawhpen, Rs vbc 44.89 hi dah let ni se, a daih loh chin zawng siamna tur pawh hi written assurance awm rawh se’ tiin resolution an pass.
MZP Hqrs Lunglei hmalakna hi Lunglei leh a chhehvel, Lunglei khawpui paltlang maxicap service bakah lirthei hmanga eizawng pawl hrang hrangten an thlawp thu thuchhuah an siam a. Hei bakah Lunglei |halai Pawl, Chhimbial Chhantu leh Hnathial |halai Pawlte pawhin an thlawp tih an sawi bawk.
Hetihlai hian, ZPM Southern Hqrs Lunglei chuan thuchuah siamin ATL Road siam chungchangah chhim lam mipuite lungawina ngei tura hmala tura sorkar an phut thu leh party office hawn pawh hreawm an tih thu thuchhuah siamin, nimin pawh khan party pisa hawng mah se, pisa hna tul engmah thawh loh an tum tih an thuchhuahah an tar lang tawh bawk.