Aizawl: April 28, 2025-a Lengpui Airport panna kawng, Lengpui Pukpui tuikhawhthla bula kawng chhak lam atanga lung tlain a delh avanga thi mi pathumte chu nimin khan Mizoram sorkarin Rs nuai 12-in a ral.
Nimin khan nunna chan – Lalrinliana, h/o Lungtiawii, Lungtiawii w/o Lalrinliana leh Vanlalhruaii, d/o Lalrinliana te chu Falkland Presbyterian Kohhran Hall-ah vui an ni a. A vuina inkhawmah hian DM&R Minister Prof. Lalnilawma leh Aizawl East I bialtu MLA Lalthansanga te chuan Mizoram sorkar hmingin ralna sum an hlan.
Vuina inkhawmah hian DM&R Secretary K. Lalrinzuali leh Aizawl DC Er. Lalhriatpuia bakah DM&R thawktu dang thenkhat an tel bawk.
Tar lan tawh angin Thawhtanni chawhnu dar 3:45 vel khan Hyundai i10 car (MZ-04 0330) chu Lengpui lam atanga Aizawl pana a tlan laiin, Lengpui Pukpui tuikhawthla bula lung tlain a delh a. Lirtheiah hian mi pali – hmeichhia pahnih leh mipa pahnih an chuang a. An zingah lirthei khalhtu Lallawmzuala, s/o Lalrinliana, Falkland chu dama lak chhuah a ni. Lirtheia chuang dang mi pathumte hian nunna an chan a ni.