Mizoram Board School Education (MBSE) chuan nimin khan High School Leaving Certificate (HSLC) Examination 2025 result a tichhuak a, pass percentage 76.68% niin, kum hmasa 73.37% aiin pass percent 3.31-in a sang zawk. A pum puiah PC Lalthakimi, K.D. High School, Aizawla lut chu pakhatna a ni.
Kumin HSLC Examination-ah hian exam hmachhawntu zirlai 18,946 awmin, regular student 18,603 leh private-a exam mi 343 an ni a; pass zawng zawng zirlai 14,527 zingah hmeichhia tam zawkin 7,617 an ni a, mi 6,910 chu mipa an ni a. Regular-a exam zingah 14,367 (77.23%) pass-in, private candidate zinga 160 (46.65%) an pass.
Zirlai pass zingah 1,343 chu distinction-ah an pass a; first division-ah zirlai 3,763, second division-ah 5,785 leh third division-ah zirlai 3,636 an pass a. Compartmental chance nei zirlai 64 an awm a, zirlai 4,355 an fail a ni.
Regular candidate bikah district hrang hranga zirlai pass percentage chu – Aizawl district sang berin 86.09% a ni a. Siaha district-in dawtin 83.84%, Khawzawl district-ah 81.29%, Champhai district-ah 80.67%, Hnahthial district-ah 80%, Serchhip district-ah 76.63%, Kolasib district-ah 68.32%, Saitual district-ah 67.99%, Lunglei district-ah 67.43%, Mamit district-ah 66.11% leh Lawngtlai district-ah 56.19% a ni.
Sorkar sikul atanga candidate 6,505 zingah zaa 60.97 an pass a, deficit school atangin candidate 1,328 zinga zaa 91.42, aided school atangin candidate 2,627 zingah zaa 63.90, lumpsum school atangin candidate 590 zinga zaa 59.06 leh private school atangin candidate 7,553 zinga zaa 72.33 bakah private candidate 343 zinga zaa 46.65 an pass.
Kumin HSLC-ah hian top 10-ah mi 24 an lang a; a pum puiah PC Lalthakimi d/o Darthuama, Armed Veng, K.D. High School, Aizawl-a lut chuan mark 500-ah 479 hmuin pakhatna a ni.
HSLC 2025 result chanchin neuh neuh:
- A pum pui thuah exam hmachhawn mipa aiin hmeichhia 11,673-in an tam zawk a. Pass zat pawh 707-in hmeichhia an tam zawk.
- Subject malah chuan SS-a fail an tam ber, 3,786 an fail a. Mizo/language subject-ah fail an tlem be thung a, 648 an fail thung.
- District malah (regular candidate) chuan Aizawl district pass percentage a sang ber, 86.09% a ni. Lawngtlai district an hniam ber a, 56.19% an pass.
- Ram puma pakhatna hian mark 479 a hmu a, nikuma pakhatna aiin mark 6 in a hmu tlem zawk.
- Subject malah Science-ah hian 100-ah 100 hmu pakhat a awm a. Mathematics-ah 100-ah 100 hmu pakhat a awm bawk.
- An candidate zawng zawngte pass vek hi school 107 an awm. Candidate zawng zawng fail vek hi school 13 an awm.
- Management wise-ah chuan Deficit school-in an titha ber a, 97.62% an pass.
Compartmental exam buatsaih thuai tum
MBSE Chairman JH Zoremthanga chuan kum 2025 High School Leaving Certificate (HSLC) result tihchhuah takah, compartment chance neite tan exam buatsaih thuai an tum tih a sawi.
Thawhlehnia HSLC result tar chhuah anih hnua thu thar thehdarhtute’n an kawmnaah MBSE Chairman JH Zoremthanga chuan, ruahman lawk anga result an tihchhuah theihna chhan bulpui ber chu high school zirtirtute inpekna leh thahnemngaihna vang a ni tih a sawi a. Education department pum pui an tanrualna avang te, police department leh health department-ten an mawhphurhna tha taka an hlen chhuak te, centre superintendent leh invigilator ten discipline an lehkhawh that avang leh exam kaihhruainate an kenkawh that avangin naupang entawn expel ngai an awm lo chu lawmawm a tih thu a sawi.
JH Zoremthanga chuan kuminah hian compartment 64 awmin, he’ng naupangte hian admission an tlai lohna turin compartment exam buatsaih thuai an tum thu a sawi a. HSLC result complaint hun chhung atan ni sarih hawn a nih thu a sawi.
MBSE chairman chuan HSLC exam zawhna hi LOTS atanga zaa 60 siam niin, s bak zaa 40 hi application leh HOTS atanga siam a nih thu sawiin, “Zirnain hma a sawn zel theihnan HOTS question hi telh tam deuh deuh tura ruahman a ni,” a ti.
HSLC pass zawng zawngte an lawmpuiin, duhsakna an hlan a, a hlawhtling ve lote pawh beidawng mai lova exam leh huan pass ngei tawh tura thahnem ngai taka zir turin leh bei fan fan turin a chah nghal bawk.