Sweden-a Uppsala khawpuia inkahnaah mi pathum an thi tih police-in an sawi.
Inkahna hi khawpui lailia Vaksala Square bul lawk sam siamna hmunah a ni tih tual chhung chanchinbute chuan an tar lang a. Silai hmet puaktu hi shooter-in a tlanchhe zui a, zawn mek a la ni tih an tar lang.
Officer-te chuan hmun zau tak dangping nghalin tualthahna thleng chhui hna an thawk zui nghal.
Inkahna hi Walpurgis spring festival hman dawn laia thleng niin an khawpui, Stockholm hmar lama awm, university avanga hriat hlawh tak ni bawk, Uppsala kawtthlerah festival hman tum mihring pawh an tam hle lai a ni.
“Rang takin thil a thleng a, a puak a, a puak mawlh mawlh nghal mai a ni,” tiin a hmutu pakhat chuan Swedish channel TV4 hnenah a sawi.
‘Lian taka hmalak’ zui nghal a ni a, police helicopter hmangin a kaptu zawn hna hi thawh tel a ni tih police thupuangtu, Magnus Jansson Klarin chuan TV4 hnenah a sawi.
A titu hi a tlan bo theih loh nan heng lai vela rel tlan pawh tihtawp nghal a ni tih Klarin-a chuan a sawi a; mahse, a hnuah tlantir lehnghal a nih thu a sawi.
Thite leh silai hmet puaktu hi tute nge an nih hriat chian theih a la ni lo va; mahse, tun hnaiah Sweden-ah hian silai hmeh puah leh gang-te chetna a pung hle tih erawh a chiang a, sorkar pawhin an rama silai thununna dan khauh zawk hman an duhg tih an lo sawi tawh thin.
February khan Orebro khuaah pawh adult education centre-ah inpawngkahna thlengin mi 10 lai an lo thi tawh a ni.