HSLC result hi mizote thinlungah chuan a la tla na hle a, ngaihven pawh a la hlawh reng bawk. Zirlaite tan chona hmachhawnna hmasa leh inelna thianghlim bul tanna pakhat a nih miau avangin a la hlu reng pawhin a rinawm.
MBSE chuan HSLC result tichuakin, kum hmasa aiin pass percentage pawh a sang leh hret a, hmasawnna kawl a eng hret hret pawh a tihtheih awm e.
Hetih lai hian kumtina sawi loh theih loh thin chu pass awm miah lohna school awm thin hi a ni. Kuminah hian candidate zawng zawng pass vekna school 107 lai a awm laiin, candidate zawng zawng fail vekna school hi 13 lai mai a la awm a, sorkar hian heng ho hi a ngaihtuah zual deuh chu a ngai a ni.
Quality education kan sawi fo a, quality teacher pawh kan sawi ri fo ta. Tin, zirtirtute hi trained chhuak thlap an ni tawh bawk. Fail-na school ho hian chhuan lam chu an nei ngei ang, chutihrual erawh chuan a chhan dik tak hi chhui a, a tul a nih chuan school tihtawp emaw, a remchan dan anga zirtirtute her rem emaw kalpui a ngai pawh a ni thei.
Sorkar hian ngaihtuahna hmang se, candidate fail vekna school ngat phei hi chu vil ulukin, mut mawh hnar mawhah nei ngei teh se.