Dutlang North lo champion-pui tawhtu coach hovin Pro Volleyball League-a an tel vawi khatna turah Sihphirin an duh zawng player an lak luh theih bawk avangin a tikimtu nih ngawt an tum lo.
Sihphir hian Indian Navy player Niyas Addul Salam an la lut a, thlaveng atan Javed Khan an be fel bawk.
Kum 2022-a Durtlang North champion-puitu Lalchhuangliana chuan, “Ka player duh zawng, Niyas kan nei thei bawk a, kan khelh dan azirin Sihphir khawtlang pawhin boruak an neih len theih ka ring,” a ti.
“Thil awm dan tur sawi lawk a har a. Ball vuak lak kawngah kan player-te an tha tawk lo deuh a; chuvanginm fitness nei tha tur leh tlo taka khel thei turin kan inbuatsaih,” a ti.
Tun season Pro Division inelnaah Sihphir an che tha lo a, Mizoram Volleyball Assoctian (MVA) Invitation Cup-ah semi-final lut pha lovin MVA Cup-ah team pali an inel a, a hniam ber ni chungin tournament an khar bawk.
An hmabak a hautak a, Pro Volleyball-ah danglamna thlentir tumin an veng hall-ah ngawrh takin an inbuatsaih a. Coach Chhuangtea chuan an khelh hmasak bera an chet danin an hma lam hun a hril hle dawn tih a sawi.
Tun tum hi Pro Volleyball League awm tawha team an intluktlan ber a nih a ring a. “TNT chu team tha sa an ni a, team dangah state pawn atangin player tha tak tak an la lut a, tute mah hi hneh awlsam an awm lo ang,” a ti.
Sihphir hian tun hnaiah Khawhai player hriat hlawh tak, Lalhmunmawia an la lut a, Pro Volleyball-a tawn hriat nei tawh – Thangminlal Guite, H Lalrinmawia, PC Lalnuntluanga leh setter H Lalruatsanga bakah kum 2022-a Durtlang North an champion tuma tel, Samuel VL Nunhlim an kawl bawk.
- SIHPHIR FIXTURE (League round):
MAY 1, 2025 (NINGANI) – 8:00 PM
Sihphir v Anastasia Electric Veng
MAY 2, 2025 (ZIRTAWPNI) – 8:00 PM
Khawbel v Sihphir
MAY 6, 2025 (THAWHLEHNI) – 8:00 PM
Hunthar v Sihphir
MAY 9, 2025 (ZIRTAWPNI) – 8:00 PM
Sihphir v Thutak Nunpuitu Team
MAY 17, 2025 (INRINNI) – 8:00 PM
Tuichangral v Sihphir
- Sihphir SQUAD:
- Mesak Malsawmkima
- Lalhriatchhunga
- Nelson Zothanpuia
- Lalthantluanga
- Francis Lalrintluanga
- Lalrinhlua Hnamte
- Lalneihkima
- PC Lalnuntluanga
- H Lalrinmawia
- Albert Zothankhuma
- H Lalruatsanga
- Thangminlal Guite
- Daniel Lalnunmawia
- Lalhmunmawia
- Samuel VL Nunhlima
- Niyas Abdul Salam
- Javed Khan
Coach : Lalchhuangliana
Assistant Coach : RD Fanai, Lalkapsanga