Aizawl: Group YMA anga Group Anti Drugs Squad din hmasa ber nia hriat, Chalfilh Group YMA chuan fuihna leh lawm luhna hun an hmang. He hun hi Central YMA Vice President Prof Lalnuntluanga’n a hmanpui.
Thawhlehni zana Chalfilh Run, Darlawna Group anti drugs squad fuihna leh lawm luhna hun hmanpuitu, Central YMA Kumpuan Committee Chairman ni bawk, Prof Lalnuntluanga chuan ruihhloin Mizoram a chiah dan leh Mizo mipa thi an thahnem chu veiawm a tih thu a sawi a. Hnam kal zel an inchhiarnaah mipa fa atanga chhiar thin an nih avangin hnam anga him nan tan lak a tul thu a sawi.
Mizorama ruihhlo do kalpuinaah sorkar kuta innghah a remchang lo tih sawiin Prof Lalnuntluanga chuan, “Khua leh tui kan nih anga kan mawha kan lak leh tlawmngai pawl YMA-in theihtawp kan chhuah a tul tak zet a. YMA hian kan ram leh hnam, sakhua himna tiderthawngtu ruihhlo do zel tur hian tan lak nat zel a tul a ni,” tiin, kuang lo nawr anga sawi thintute an awm mek lai hian YMA hian a kuang ngei a nawr thin thu a sawi bawk.
GADS lawmluhna inkhawm hi JW Lalrinawma, President, Chalfilh Group YMA in a kaihruai a. Member-te inhmelhriattirna hun R. Zothangliana, Secretary, Chalfilh Group YMA-in a nei thung.