MZP Hqrs., Lunglei chuan sorkar laka an lungawi lohnate lantira ni thum chhung kawng an dan hnuah nizan khan an titawp a, Zirtawpni atangin total bandh an huaihawt thung dawn.
Nilaini khan Zobawk daiah leh Pukpui daia lirthei lut leh chhuak tur an dan chungchangah MZP Hqrs., Lunglei chuan thutkhawm hmanhmawh an nei a, ATL siamna tur sum Mizoram sorkarin a pawh pen hmuh letna tur atana ni thum chhung kawng dan an huaihawt hnuah sorkar atanga thu lawmawm engmah an neih loh avangin nizan dar 6 atangin kawng dan tihtawp an rel a. Zirtawpni (May 2, 2025) zing dar 6 atangin total bandh neih an rel thung.
Total bandh an huaihawt hma, Ningani (May 1, 2025) chu mipuiin an mamawh lakkhawm theihna atan an ruahman bawk.
MZP Hqrs., Lunglei chuan kawng an dan chungchangah mipui thlawpna zawng zawngah lawmthu an sawi a. Hma an lak leh zelna turah pawh tawiawm zel turin an ngen nghal a ni.
Tar lan tawh angin, April 28, 2025 atang khan MZP Hqrs., Lunglei chuan ATL road, Kanghmun South atanga Pukpui chin siamna tur sum Mizoram sorkarin a pawt peng nia an hriat avang leh sum pawh pen hi hnukkir tura ni 15 chhung sorkar an nghah hnuah an duh ang chhanna sorkar atanga an hmuh loh avangin Pukpui daiah lirthei lut leh chhuak turte an dang tan a. A tukah Hrangchalkawnah dang lehin, remchan zawkna avangin Nilaini khan Zobawk daiah kawng danna hmun sawnin, helai hmunah hian nimin khan lirthei 100 chuang an dang a. Heng lirtheite hi a tam ber chu bungraw phurte niin khualzin lirthei eng emaw zat an awm bawk.
Thudawn danin nimin lamah kawng danna hmuna kaltlang diltuten an biakpawh atan chief minister mobile phone no. an tar a. Zobawka an duty-na hmunah hian tlan tlang dil an tam em avangin a diltute biakpawh atan Chief Minister Lalduhoma mobile phone no. an tar nia sawi a ni.