Aizawl: Mizoram Public Service Commission (MPSC) Chairman R Lalramnghaka hovin nimin khan MPSC-a thawktuten an kum 34 tlin champha nimin khan an lawm.
Mc Cabe Hall, Aijal Club-a hun hman hi Dr. H. Lianzela, Secretary, MPSC in a kaihruai a. MPSC Chairman R Lalramnghaka leh member dangte bakah, K. Rosiamliana, Joint Secretary leh James Lalrinchhana, Controller of Examinations te thu an sawi.
He hunah hian MPSC din tirh atanga tun thlenga la thawk mekte chawmawina hun hman a nih bakah, MPSC documentary film thlir ho a ni a, MPSC Calendar leh Digital Filing System te pawh tlangzarh a ni.
MPSC hi India danpui article 315-na tlawhchhanin, kum 1991 khan din a ni a. May 1, 1991 khan Mizote zinga IAS ni thei hmasa pathumna, SR Vala chuan sorkarin a ruat angin MPSC Chairman hmasa ber ni turin a hna a zawm a. Hei hi vawiin thlengin MPSC din ni atan pawm chhoh a niin, kumin hian kum 34 a lo tling ta a ni.
A din tirh atanga vawiin thlengin MPSC hian Chairman 12 nei tawhin, member ni tawh pawh mi 21 an awm a. Anni puibawmtu (officer & staff) zinga hotupa ber, Secretary pawh mi hrang hrang 11 lai he hun chhung hian awm tawhin, tun dinhmunah hian MPSC chuan sanctioned post 86 a nei mek a ni.
Group A leh B Direct Recruitment hmanga kum 34 chhunga a lak zawng zawng belh khawm chu mi 3,792 an ni tawh a. Sorkar hnathawk lai mi tam takin kaisanna an hmuh theih nan Departmental Promotion Committee (DPC) meeting vawi 4578 zet neih a ni. Departmental Exam, Limited Competitive Exam leh induction atana exam eng emaw zat a buatsaih tawh a. Mi thahnem takin promotion an lo hmu tawh a ni.