Aizawl: Mizoram Board of School Education (MBSE)-in High School Leaving Certificate (HSLC) 2025 result a tihchhuah ram puma pakhatna, PC Lalthakimi, Armed Veng hnenah Supply Minister B Lalchhanzova, Aizawl East II MLA ni bawk chuan lawmpuina leh chawimawina thilpek a hlan.
Ningania a pisaa lawmpuina inkhawm tawi neihah bialtu MLA chuan zirlai taima leh hlawhtling chu chawimawi leh lawmpui tlak an nih thu a sawi a. A bial chhungin Mizoram pum huapa HSLC exam-a pakhatna hauh thei zirlai an nei chu lawmawm a tih thu sawiin, hetiang dinhmun a thlen theih chhan hi a thawhrim vangte, Pathian thu a awih vangte leh an zirtirtute inpekna vang a ni tih a sawi
PC Lalthakimi chu a hun tawnte nuam ti taka hmachhawn zela Mizoram leh hnam tana bei chho zel turin a chah bawk.
Minister hian PC Lalthakimi hnenah hian pawisa fai bakah laptop, printer, lawmpuina thuziak leh lehkhabu eng emaw zat a pe a ni.
HSLC topper chu a bial chhunga mi a nih bakah a zirna chu KD High School, Saron veng-a awm a ni leh zelte chu a lawmna a thuah tih sawiin minister hian KD High School Principal, Biakhmingliana chu lawmpuina thuziak leh Rs 10,000 a hlan bawk.
He hunah hian School Education Secretary David Lalthantluanga, Director Angela Zothanpuii leh AMC Corporator Christina Roluahpuii bakah PC Lalthakimi chhungte, Armed veng Local Council leh YMA hruaitute pawh an tel.