Chief Minister Lalduhoma chuan sorkarah aikal la an la awm chuan action an lak nghal tur thu a sawi a; sorkar hnathawkte chu hun vawng dika an hlawh phua hna thawk tur an nih thu a sawi.
Ningania Secretariat Conference Hall-a Environment, Forect & Climate Change department-te hnathawh dan thlir letna hun a neihpuinaah chief minister chuan sorkarah aikal la an awm tawh loh an beisei tih sawiin, “An la awm chuan action lak nghal tur. Hun kan inpe rei tawk tawh,” a ti.
Chief minister chuan biometric attendance tha taka kalpui an duh tih sawiin, “Sorkar hnathawkte hian hun kan vawng dikin kan hlawh phuin hna kan thawk tur a ni. Service Review Committee te pawhin hna an thawh tawh hlawm kan beisei a, chhawr tlak ngang loh hnathawktu chu special pension kha pek mai tur a ni,” a ti a. Officer thenkhat sorkar facilities mahni kawl theih chin (entitled) bak lo kawl an la awm chuan, an sawi tawh thin angin kir vek se a finthlak tih a sawi.
Hmasawnna hnathawh dawnah forest clearance hi lak zel a ngaih avangin hmasawnna hnathawh chak taka an kalpui theih nan lo tanpui thin tura ngenin, ram hian hmasawnna hmel thar hi hmu thuai thuai se an duh tih a sawi a. Project reng reng hi Planning Department hriatpui lova kalpui an rem tih loh thu leh Planning Department-ah thlen zel a ngaih thu a sawi bawk.
Thutkhawmah hian EF&CC hotuten an hmalakna leh hnathawhte an chhawpchhuak a. An report atangin chief minister-in hriat belh duh a neih te, zawhna a neih te zawtin, hmalak zui zel dan turte an sawi nghal zel a ni.
He huna tar lan a nih danin December, 2023 atanga vawiin thlengin Forest Clearance 12 pek fel a ni a, project pangate a thuphunga pawm an ni tawh. Project pathum chu pawm tawh sa, penal NPV pek loh an awm thung. Project pahnih clearance chu Ministry of EF & CC lam nghah mek a ni a, an dilna lehkha a fel fai tawk loh vanga nghah mek (pending) project pathum an awm a, Mizoram State CAMPA Fund hi Rs. vbc 199 a awm mek.