Assam Chief Minister Himanta Biswa Sarma-a chuan Jammu & Kashmir-a Pahalgam beihna thlen hnuah an state chhungah ‘Pakistan tantu’ mi 39 man an ni tawh tih a sawi.
Inrinni khan Hojai leh South Salmara-Mankachar district-ah mi pahnih man belh lehte nen mi 39 an tling tih a tar lang a ni.
“Ram phatsana India ram chhunga Pakistan tantu chu May 3, zan dar 10.00 thleng man an la ni a. Hojai Police-in Mistaqul Alom leh South Salmara Police-in Jahirul Islam an man belh leh a, ram do zawnga che mi 39 man an ni tawh,” tiin Sarma-a chuan X-ah a tar lang.
Assam chief minister chuan a sorkar chuan Pahalgam beihna thleng kaihhnawihah Pakistan chhan leh tan zawnga che reng reng chu an man zel dawn tih a sawi.
A hmain eptu, AIUDF MLA Aminul Islam chu firfiaka chetna thleng kaihhnawihah hian Pakistan chhan leh tan zawnga a khawsak avangin man a lo ni tawh a. Sarma-a chuan MLA an man hi Pakistan tan zawnga thu a sawi avanga man an nih thu a sawi a ni.
Zirtawpni khan Sarma-a hian Pahalgam beihna thlen hnua India leh Pakistan inkar a khik mek laia ‘Pakistan zindabad’ tih auhla aupui reng reng chu an ke tihtliahsakah a lo vau tawh bawk.
Panchayat inthlan tur atana a campaign-naa thu a sawinaah chief minister chuan mipuite chu Prime Minister Narendra Modi-a leh Indian Army tana tawngtai turin a sawm a, Pakistani mi firfiakte lakah khawvel puma dikna hlenchhuah a nih theih nana tan la turin a sawm bawk.
April 22-a mi firfiakte beihna a thlen hnu lawkah khan Assam chief minister hian Prime Minister Modi-a kaihhruaina hnuaiah ramin tha taka a chhan let a rin tlat thu a lo saiw tawh a. “A huhovin Pakistan hi an phu tawk hremna kan pe ang,” a ti.
Pakistani tan zawnga che lakah pawh zahngaihna lantir a ni dawn lo tih a sawi a, Hindu-te chu inpumkhat a tul thu a sawi bawk a. Pahalgam-a mi beitute chuan Hindu an bitum tih a sawi bawk.