Mizo mipuite hian khawchhak ramri a awm kan nih ang ngeiin thil tam takah khawchhak zar kan zo a. Kan mamawh tam tak chu khawchhak atanga lokal a ni fur mai. Kan bazarah pawh khawchhak lam bungraw zuara eizawng an tam em em a. Chhungkaw tam tham tak inchawmna a ni. Tun hnaiah sorkar in khawchhak lam sumdawnna lam an hawi a. Thil tha lo inzep tam lutuk chu ngaimawhin hma an la ta a. Mipui pawhin an thlawp hle niin a lang.
Sorkarin khawchhak kuhva a sumdawn chu kan ram tan mai ni lo, India sorkar tan pawha pawi khawih tham a ni tih hriain tih tawp tumin hma a la ta a. He sumdawnna hian kan ram a khawihchhiat dan hi a namai lo hle a. Mihausa leh pawisak nei lo te in lengna ramah min siam a ni ta ber mai. Sorkar pawhin tih ngaihna an hre tawh lova. Kan sorkar kalta Home minister pawhin mit kan siai khum a ni a tih hial kha a ni a. He sumdawnna hian kan ramah dik lo taka hausa thut thut a siam tam em em a. Chutianga dik lo taka hausa thut thut tamna ramah chuan a dawt lehah dan leh thupek a buai zui thin tih kan hria. Khawvela ram nuam lo leh dan leh thupeka buai ber ber Latin America ram te kan thlir chuan hetiang ang ram nih hi kan hlat lo tih kan hre thei ang. Ani pawh sorkarin dan a lekkawh thei tawh lova. Smugglers ten an duh angin ro an rel a ni ber mai. Sorkar hmanrua police te an control tel a. Chumi chungah chuan politiciante awmin mipui chu misual rual rorelna hnuaiah an awm a ni ber.
Hetiang ho hian police an hlau lova. Tumah hlauh an nei tawh lo. Ngaihtuah chian chuan ram hrehawm ber pawla sawi Columbia te pawh hi kan ang ta khawp asin. Sorkar in huaisen taka kuhva sumdawnna do tura hma a late pawh hi a fakawm takzet a ni.
Smuggler te hi mi â an ni ngai lova. Chhuanlam chi hrang hrang hmangin hma an la dawn a. Chumi khami pawh an khap lo tih vel chu an sawi hmasak tur a ni. Mahse, mipui mamawh bungrua leh mipui tana tangkai miah lo sumdawnna hi kan thliar thiam a ngai a. Foreign bungrua zawng zawng ang khata sawi luih tlat hi smugglers te tih tur reng a ni. Chumi a lo thliar hran thiam ve chu mipui pawhin kan thiam a ngai. Khawchhak atanga lokal nihawichi, hairep, kuhva leh heroin te ang khata kan sawi lui tlat duh anih chuan kan thlir dan chuan kan ram tan pawi a khawih a ni tih i hria ang u.