Aizawl: ZPM PAC member TBC Lalvenchhunga chuan kuthnathawktute thar chhuah sawhthing theihtawpin an lei a, an beidawn san ve lo tih a sawi.
Nimina ZPM pisa-a party chhung inkhawmah thu sawiin Adviser to CM TBC Lalvenchhunga chuan, “Kuthnathawktute thar chhuah sawhthing theih tawpin kan lei a, India ram puma sawhthing market rate tlahniam leh harsatna hrang hrang sorkarin a hmachhawn chung pawhin theihtawp a chhuah a, a beidawn san ve lo,” tiin, intiam zet a ti leh si lo te ai chuan harsana karah pawh theihtawp chhuaha thutiam bawhzuitute hi mipuiten an hria tih a sawi.
TBC Lalvenchhunga chuan ALT Road chungchangah pawh sorkar chuan Central Road Research Institute (CRRI) te ruaiin tha zawk leh tlo zawka siam dan tur a ngaihtuah mek tih sawiin, “Vawiin mai ni lo nakin hun thleng sorkar chuan a thlir a, ZPM sorkar hian chhim lam mipuite hi a ngaihthah hauh lo a. Sorkar hmasa hun lai anga tum khata sum hman zawh phak bakin sanction khum vak vak ang leh a hnua K-Deposit-a dah ngai leh si ang khan sorkar thar hi kal a tum lo a ni,” a ti.
Aizawl West I bialtu MLA ni bawk chuan Mizoram Universal Health Care Scheme (MUHCS) chungchangah sorkar hmasa hun lai anga Rs vbc 20 vel dah a, Health Care kalpui ve tawp leh a hnua leiba tlingkhawm ang kha pumpelh an duh tih sawiin, “Sorkar chuan Rs nuai 50 thleng dahkham kan inhuam a,” a ti a. Private hospital-te hnenah pawh an harsatnate sorkar nen sawiho tura sawm ni mah se, vawiin thleng hian a chhanna an dawng lo chu mak an tih thu a sawi a. Sorkar chuan private hospital-te nen tangruala mipui tan theihtawpa thawhho an duh thu leh ruahmanna famkimlo awmte pawh sawiho an inhuam reng tih sawiin, sorkar chuan MUHCS thar hi mipui tan hlawhtling taka kalpui ngei an duh tih a sawi bawk.