LESDE Minister Lalnghinglova Hmar, Aizawl West II bialtu MLA chuan a bial chhunga HSLC Exam 2025-a Top 10-a langte leh MPSC Combined Competitive Examination 2024 a hlawhtlinna changte lawmpuina hun a pisaah a buatsaih.
Thawhlehni tlaia hun hmanah bialtu MLA chuan HSLC a hlawhtlinna changte chu a lawmpui thu sawiin, “Zirlai nih lai chuan hlawhtlinna ropui tak a ni a; mahse, hei hi in bul tanna chauh a ni a. Pen khatin hma in sawn a, a lehpek a la awm a, in kal zelna turah duhsakna ka hlan che u,” tiin a fuih.
MPSC Combined Competitive Exam-a tling tharte chu an thawhrim rah an seng a, a lawmpui thu a sawi a. “Phaiah kan kalin All India Services leh Central Services-ah Mizo dawr tur an awm thin lo hi rualawh a na duh a; chuvangin, a tumna kan nei a nih chuan theihtawp chhuahin bei ila, a tluk a awm lo. Chutihrualin tuna kan service-ah pawh rinawm leh dik takin kan hnaah thahnemngai ila, ram tana hnathawk kan ni,” tiin a chah bawk.
MLA hian HSLC-a pasarihna Arza Lalawmpuii leh pakuana Steven Lalawmpuia te hnenah lawmpuina thuziak leh laptop a hlan bakah, MPSC Combined Competitive Exam a tling C. Lalchhandami, Lalhruaizela leh Andrew Laldosanga Ralte Rengci te hnenah lawmpuina thuziak leh sum fai Rs 20,000 theuh a hlan.