Aizawl: Environment, Forests & Climate Change (EF&CC) Minister Lalthansanga chuan ram hmasawnna leh thilnung chi tinrengte humhalhna chu kalkawp tlat tur a nih thu a sawi.
Nimin khan khawvel pumah International Day for Biological Diversity lawmna hun hman a ni. Mizoramah pawh he ni pualin hmun hrang hrangah ‘Harmony with Nature and Sustainable Development’ tih thupui hmanga hman a ni a. A lawmna pui ber ATI Auditorium, MINECO, Aizawl-ah Mizoram State Biodiversity Board leh National Biodiversity Authority (NBA)-ten an buatsaih a ni.
He hun hmanpuitu EF&CC minister chuan ram hmasawnna leh thilnung chi tinrengte humhalhna chu kal kawp tlat tur a nih thu sawiin, “Nungcha venhim hna chu kan tih makmawh a nih avanga thawk tur kan ni lo va, kan hmalam hun innghahna pawimawh a nih avanga thawk tur kan ni zawk,” a ti a. Tunlai khawvel inher zelah harsatna thar lo chhuak zel hre reng chungin humhalhna ngaih pawimawh a tul thu a sawi.
PCCF Mizoram R.K. Tiwari kaihhruai inkhawmah hian H. Lalengmawia, Commissioner & Secretary i/e EF&CC Department leh Chairman, Mizoram State Biodiversity Board, M.Z. Singson, Member Secretary, MSBB, Shikha Sinha, NBA Intern leh Vanlalhrima, BIOCONE-ten thu an sawi.
He hunah hian BMC member-te, zirlai naupangte leh environmental NGO-te leh department hrang hrang atanga sawm bikte an tel a. He ni lawmna puala Mizoram State Biodiversity Board-in High School Level Painting Competition, Open Photography Competition leh Biodiversity Management Committee (BMC)-te tan Signboard siam intihsiakna a buatsaiha lawmman te hi ninister-in a sem.