Aizawl: Chief Minister Lalduhoma’n nimin khan Satluj Jal Vidyut Nigam (SJVN) Limited-a an Chairman & Managing Director, Sushil Sharma leh SJVN hotu dangte chu New Delhi-a Mizoram House-ah a kawm, kawlphetha megawatt 2,400 pe chhuak thei tur project ruahmanna leh hmalak zui zel dan tur an sawi ho.
Union Power Minister nena an inkawmna bawhzuiin Power Ministry hnuaia awm, Satluj Jal Vidyut Nigam Limited-a hotute nena an inkawmnaah Darzo Luia Pumped Storage Project, kawlphetha Megawatt 2400 pe chhuak thei tur project an ruahman te chief minister hi an hrilhfiah a, hmalak zui zel dan tur te an sawiho nghal.
Chief Minister hi MP Richard Vanlalhmangaiha, Adviser to chief minister Lalmuanpuia Punte, MLA, Chief Secretary Khilli Ram Meena leh sorkar hotu pawimawh dang ten an tawiawm.
Nimin vek khan chief minister hian Union Jal Shakti Minister CR Patil chu a chenna inah a kawm bawkin, Mat Luia Integrated Water Resources Management Project chungchang a sawipui.
Mat Lui Project hi thlai chawmtu tur tui lakna leh mipuite tui tlan tur lakna atana ruahman a ni a. An inkwmnaah hian Brahmaputra Board nena hmalak tura tih niin chak taka bawhzui an rel a ni.