India Meteorological Department, Ministry of Earth Science chuan khawchin a thlirlawk danin, vawiin leh naktuk hian Mizoram hmun thenkhatah ruah leh thli thawk thei niin a tarlang a, mipuite fimkhur tura chahin, sorkar pawh ruahmanna siam turin a ti bawk.
Kum hmasa lamah hetiang dinhmun angah hian kan lo dingin, chhiatna lian tham fe fe a lo thleng tawh thin a, sorkar chet muan lek lek chang a awm bawk.
IMD lamin thuchhuah an siam hian a thleng ngei ang tih lam a ni lo a, lo inhmakhua a, lo inbuatsaih lawk kha kan tihtur a nih avangin ruahmanna lo siam ve thuai thuai hi mai a tul hle zawk a ni.
Hetiang hunah hian zirna in te bawk hi an khawngaihthlak zual thin a, zirlai naupang zawkte phei chu kaltir loh mai thin hi a fuh hle. Nu leh pate tan ngaihtuah an na a, kan khaw awmdan enin zing lamah ni sa tha viau mah se, reiloteah ruah tam deuh a rawn tla leh thin bawk nen, sorkar hian zirna inte hi ngaihtuah hmasakah emaw tal chuan nei thei se la, eng thil mah a thleng ta lo a nih leh a lawmawm a ni mai a, tisual ta duaia inngaihna chi pawh a ni chuang lo.
Kan khawchin thlirtute lo hmuhlawk leh thlirlawkna hi ngai pawimawhin zawm ila, mipui lam pawh a theih ang anga kan lo inbuatsaih chhoh ve zel a tul awm e.