Aizawl: Mizorama skill leh entrepreneurship lama hmalakna awm theite sawipuiin LESDE Minister Lalnghinglova Hmar chuan IIE Director Ishwar Chanabasappa Poojar a kawm.
LESDE minister hian nimin khan Indian Institute of Entrepreneurship (IIE), Guwahati tlawhin IIE Director Poojar a kawm a. Lalnghinglova Hmar chuan IIE hi a thawm hre thin mah se Mizoramah an la chhawr tangkai tawk lo va, IIE kaltlanga skill leh entrepreneurship lama hma thar lak an duh thu leh Mizoram nen inthlunzawmna tha an mamawh thu a sawi a. Ministry of Skill Development and Entrepreneurship hnuaia awm a nih angin LESDE Department nen tan kawp a tul dante a sawi.
IIE director chuan Mizoramah a taka hna an thawh tawh tur thu leh a bul tanna atan sikul thlan chhuah thenkhatah rain water harvesting tih dan inzirtirna neih a, a hmanruate leh a hnathawktute thlangin IIE kaltlangin ruahtui khawl leh a vawn himna an ngaihtuahsak dawn bakah naupangte tui ren chem, tui thianghlim khawl kawnga kaihhruaina pek paha entrepreneurship an zirtir tur thu a lo hrilh.
IIE lam hian Mizorama tourism hmasawnna turin entrepreneurship keng tel project siam an duh thu leh, chumi kawngah chuan Mizorama sorkar department hrang hrang telna meeting neiha ke pen an duh thu an sawi chu tourism minister ni bawk, Lalnghinglova Hmar chuan tihhlawhtlin a nih tur thu a hrilh.
Lalnghinglova Hmar chuan IIE hnuaia scheme kalpuite chu Mizoram chhunga an tih dawnah MSDE zawmtu department LESDE hriattir tur leh, anmahni kaltlanga kalpui thin turin a chah a; sorkar laipui, PSU leh funding source dang atanga skill leh entrepreneurship kawnga hmasawnna hna awm reng rengte chu LESDE Department an hriattir ziah thin tur thu leh a rang lama email-a an umzui tur thu IIE director chuan a sawi.
IIE kaltlanga training, capacity building leh scheme hrang hrang kalpui thin chu tihlen an tum thu leh chak zawka kalpui turin sorkar laipui lamin an hrilh thu Director chuan a sawi bawk.
LESDE minister hi Dr. Saithangpuia, Deputy Resident Commissioner, Guwahati Mizorawm House-in a tawiawm a ni.