Aizawl: Zoram Medical College & Hospital hotuten Union Minister, Women & Child Development Savitri Thakur hnenah damlo enkawl leh hriselna chungchanga harsatna hrang hrang an neihte an thlen.
Nimin khan Union Minister Thakur hian ZMC&H tlawhin, academic hotute leh zirtirtute a kawm a. An inkawmnaah hian ZMC&H-in hma a sawnnate leh Mizoram mipuite hriselna tura an hmalakna dan tur leh zirna chungchangte sawiho a, damlo enkawl leh hriselna chungchanga harsatna hrang hrangte Union Minister Thakur-a hnenah an thlen bawk.
Union Minister Thakur hian Mizoram chhunga sorkar hmalakna hrang hranga tlawmngai pawl – YMA, MHIP, MUP, Kohhran leh a dangte tha thawhna leh thawhhona chu ropui a tih thu a sawi.
An inkawm zawhah Union Minister Thakur-a hian ZMC&H building sak mekte, Creche (Child Care Centre) te, Ministry of DoNER hnuaia NESIDS (OTRI) Scheme-a thawh ‘Residential Hostel’ pahnih, Hosteller 82 ve ve awm theihna leh Emergency Department, Obstetrics, Gynaecology Ward, Paediatrics Ward, SNCU leh NICU-te a fang.
Hei bakah Union Minister Thakur-a hian Aibawk BDO office-te, PHE leh Rural Development Department tanghova an siam Plastic Management Unit te, Aibawk Anganwadi Centre -III te, kum 2024-a sak zawh Panchayat Bhawan Aibawk te, PMAY (Gramin) mirethei in sak tanpuina luah luh tawhte leh MgNREGA hnuaia kawng siam a tlawh bawk.
Union Minister Thakur-a hian hmun hrang hrang a tlawh hnuah Mizoram chhuahsan turin Lengpui Airport a pan tlang a ni.