Aizawl: MNF-in thuchhuah an siam danin, ZPM party worker-in intihhmingchhiatna thubuai a theh luh chu court-in thu tling lo tiin a hnawlsak.
Thuchhuahah hian, July 16, 2024-a MNF Gen. Hqrs-in press release an tihchhuahah, Vairengte leh a chhehvel a kuhva rah ro bothlau zawnchhuah tuma hmalakna kal zelah, July 7, 2024-a Mizoram Police-in Phaisena 407 truck trip khat leh an lakchhuahna kudam atanga bag 145 vel lakchhuah anih thu puanzar anih chungchangah, heng kuhva neitu hi Lalchhuanliana, Ruantlang, ZPM Champhai South Block Information Joint Secretary ni a hriat a nih thu tarlan a ni a. A farnu chu Ruantlang ZPM VC member niin, a unaunu pasal hi ZPM Champhai South Block President ni a hriat a nih thu tarlan niin an sawi.
He press release-a hming ziaktu, Lalthakima, Joint Secretary, Media & Publicity department, MNF leh social media lama post chhawngtu Lalmuanga, Tuirial Airfield te lakah Hrangchalliana, Ruantlang, Champhai chuan court-ah criminal complaint a theh lut a. He thubuai thehluh hi court chuan May 22, 2025 khan order tichhuakin, intihhmingchhiatna lam thil a hmuh loh avangin thu tling lovah ngaiin a hnawlsak niin MNF chuan an tar lang.
ZPM sorkarna hnuaia hnuaia ruling party mi leh sate huat thu a chhe em em mai hi thil vanduaithlak tak, nuihzatthlak takah an ngaih thu sawiin MNF chuan, “Thil ho tete-ah FIR thehluh an uar lutuk leh Court-a zualko an ching em em mai hian ngaihdan dang neite reng reng an ngaihtheih loh zia leh an beidawn zia a lantir,” an ti.