Social Welfare Minister Lalrinpuii’n ruihhlo hi Mizo hnam hmasawnna daltu lian tak a nih avangin a dona kawngah tanrual a pawimawh thu a sawi.

Ni hnih awh tur, khawvel pum huapa ruihhlo hmansual chungchang zirhona, ‘International Conference on Substance Use Disorder’ chu nimin khan social welfare minister-in MZU Auditorium-ah a hawng a. MZU-in zirhona a buatsaih chu lawmawm a tih thu sawiin, hmalakna sawt zawk leh tha zawkte sawihona leh zirhona engah lo chhuak thei ngei se a beisei tih a sawi.

Lalrinpuii chuan ruihhlo hi Mizo hnam hmasawnna daltu lian tak a nih thu sawiin, “Ruihhlo chuan taksa leh rilru a tichhe nasa hle a. Ruihhlo dona kawngah kan tanrual tlan a pawimawh tak zet a ni,” a ti.

Women & Child Development Department Director Dr. Lalhriatzuali Ralte pawhin ruihhlo dona kawnga department hmalakna hrang hrangte a sawi a. Ruihhlo dona leh ruihhlo ngaite enkawlna kawngah mi thiam, khawtlang mipui, kohhran leh sorkar thawhhona a pawimawh thu a sawi bawk.

School of Medical & Paramedical Sciences, Mizoram University hnuaia Department of Clinical Psychology-in an buatsaih ruihhlo hman sual chungchang zirhonaah hian India ram chhung leh pawn atangin mi thiamte leh ruihhlo ngaite enkawlna lama thawktute chuan conference thupui, ‘Global Perspectives, Local Challenges & Integrated Solution’ hmangin zirtirna an pe a ni.

Hawnna inkhawmah Social Welfare Minister Lalrinpuii’n Conference puala souvenir buatsaih a tlangzarh a ni.

Ruihhlo ngai enkawlna hmun inziah luh ngai

Social Welfare, Women & Child Development department chuan Mizoram chhunga ruihhlo ngaite enkawlna din tum emaw, ding tawh sa zawng zawngin June 1, 2025 ral hmain dan anga inziak lut (accreditation) vek turin hriattirna a tichhuak.

Hriattirna tihchhuahah hian, Mizoram Drug (Controlled Substance) Act, 2016 Section 42-in a phut angin, Mizoram chhunga ruihhlo ngaite enkawlna, Drugs (Controlled Substance) De-addiction & Rehabilitation kaihhnawih home emaw, center emaw, din reng reng chuan Social Welfare, Women & Child Development department hnuaiah dan anga inziahluh vek tur a ni a. Centre din tum emaw, ding tawh sa emaw zawng zawngin June 1, 2025 atangin accreditation dilna dilna form chu Directorate of Social Welfare website socialwelfare.mizoram.gov.in atanga download-in, June ni 30 ral hmain document tul dang te nen Directorate Social Welfare E-mail swtamizoram@gmail.com ah theh luh leh tur a ni a. A hard copy-in Director Social Welfare ah thehluh bawk tur a ni a, a copy khat erawh mahni bialtu District Social Welfare Officer hnenah thehluh bawk tur a ni.

Accreditation hi District Accreditation Inspection team-in July thla chhungin an endik dawn a. August 15, 2025 ral hmain endikna report hi Director, Social Welfare hnenah thehluh leh tur a ni ang.

Endiknaa tling center te hi thla ruk chhung Provisional Accreditation pek an ni phawt ang a, chumi chhungin danin a phut ang minimum standard a siamte zawm turin hma an la ang a, hemi hnuah endik leh an ni ang.

Tehfung hrang hrang hmanga endikna report te chu Accreditation Committee-in a ngaihtuah hnuah tlinga pawm an nih chuan accreditation hi pek an ni dawn a ni.