India ramah COVID-19 kai an pung thar mek zel a, a vei mek mi 3,000 chuang leh tawhin Kerala, Maharashtra leh Delhi chu a tuar na ber an ni rih mek.
Ministry of Health & Family Welfare-in an website-a an tar lan dan chuan hri vei mek hi mi 3,395 an ni a, kar hmasa aiin 1,200% chuangin an tam zawk a. My 10 khan 257 niin May 26-ah 1,010 an ni.
Zirtawpni leh Inrinniah khan a kai hmuh chhuah thar mi 685 an awm a, mi paliin an thihpui bawk.
Kerala chu India-a a tuar na ber niin Zirtawpnia endik zingah mi 189-in an kai tih hmuh a ni a, a vei mek hi mi 1,336 an awm.
Maharashtra (467), Delhi (375), Gujarat (265), Karnataka (234), West Bengal (205), Tamil Nadu (185) leh Uttar Pradesh (117) ten an dawt.
Rajasthan (60), Puducherry (41), Haryana (26), Andhra Pradesh (17) leh Madhya Pradesh (16) te chu Covid kai hmuh chhuah a pun mekna a ni bawk.
Sorkarin a chhinchhiah dan chuan kuminah Covid hi mi 26-in an thihpui tawh.
Indian Council of Medical Research (ICMR) chuan India khawthlang leh chhim lama sample an lak an zirna (genome sequencing)-ah chuan kum 2022-a India tibuaitu, Omicron atanga insiam danglama chi thar chhuak chu tun laia miin an kai ber hi niin an ngai.
Hengte hi LF.7, XFG, JN.1 leh NB.1.8.1 tia an sawi thu ICMR chief Dr Rajiv Behl chuan a sawi a. A hmasa pathum hi a ni deuh ber tih a sawi bawk.
COVID-19 hi chhim lam atanga darh tanin khawthlangah a kai a, hmar lamah a darh zui niin a sawi a. Hri a darh dan hi Integrated Disease Surveillance Programme (IDSP)-in an vil reng tih Dr Behl chuan a sawi.
Dr Behl-a hian hri leng mek hi a nat dan a na lutuk lo va, a darh chak lutuk lo bawk a, hei vang hian chiai a tul lo niin a sawi.
World Health Organisation (WHO) chuan thla hmasa khan LF.7 leh NB.1.8.1 te hi ‘thlithlai ngai’ huangah a dah a. “Ram thenkhatah NB.1.8.1 hi darhin damdawi in luhpui ngaite pawh awm bawk mah se a hmaa mite anga natna na tak thlen thei ang a ni lo,” tiin May 23 khan a lo sawi tawh.
Tuna an hriat theih chinah a hmaa vaccine lo lak tawhte khan heng chi thar chhuak mek lakah hian natna tak thlen thei lakah a la veng thei zel niin a sawi bawk.