Aizawl: Sentezel Quarry (Aizawl-Thenzawl-Lunglei road) chu Inrinni zan khan nasa takin a chim belh. He lai kawng hi tihtlang theih hun tur hriat a ni lo. Quarry chimin kawngpui a hnawhpin avangin khualzin tangkhang an tam hle.
Tun ni hnih chhunga ruahsur nasa avangin Sentezel Quarry chimin kawngpui hnawhpingin lirthei eng chi mah kal tlang theih a ni lo va. Inrinni zan khan nasa taka chim belh leh a. Pathianni zing khan Hitachi pahnih hmanga kawng hi tihtlang tum ni mah se, lung tla a awm reng avangin hnathawh ngam a ni lo.
Nimin khan kawng hi tihtlang hman a beiseiawm loh va, khua a hul deuh hma phei chuan Quarry chim avanga kawng titlang tura hnathawh ngam pawh a nih loh mai bakah, kawng hi titlang theih pawh nise, khualzin tan pawh a him lo nia sawi a ni.
Inrinnia Thenzawl leh Buarpui inkar kawng thenfai hman tak loh hmun hnih chu nimin chawhma khan lirthei tlangtir hman tum a ni. He thu buatsaih lai thleng hian kawng hi tihtlang a nih leh nih loh hriat a ni lo.
Chalkhan kawn (Thenzawl) leh Serchhip inkar pawh hi hmun li-ah leimin avanga total road block a awm a. Kawng dan chah loh tam tak awm bawkin, kawng thenfai hna thawk turin JCB tirh a ni. Serchhip lamin JCB an hmuh theih chuan chhak lam a\angin an nawr tura ruahman a ni bawk.
The Zozam Times thudawn danin, Sentezel Quarry chimin kawngpui a hnawhpin avangin khualzin tangkhang an tam hle. Nimin lamah Sialsuk lamah mi 200 chuang awmin, Inrinni zan khan Ramlaitui lamah khualzin tangkhang chawi ei pawh mi 350 vel an awm. Khualzin tangkhang tam zawkin Thenzawl an pan bawk.