Chief Minister Lalduhoma’n tun hnai ruahpui vanga Mizoramin harsatna a tawk mek chungchangte sawiho tura thutkhawm (meeting) a ko va, district capital-te inkalpawhna leh airport kawng ngaih pawimawh hmasak nise tih a ni.
Pathianni tlai khan CM Conference room-ah Chief Minister Lalduhoma’n thutkhawm hi ko vin, hmun hrang hranga chhanchhuahna hna thawktute, khualzin tangkhang duat taka lo tanpuia, ei tur leh riahna lo ngaihtuahsaktute zawng zawng chungah lawmthu an sawi a, Zo nun ze mawi lantir a tanpui ngaite lo tanpui zel turin an ngen.
Thutkhawmah hian district capital-te inkalpawhna leh Airport kawng ngaih pawimawh hmasak nise tih a ni a. DDMA ten chak taka hna an thawh zel theih nan a rang lama tanpuina pek chhuah zel leh chhawmdawlna (relief fund) pawh a ranglama pek chhuah zel ni se, an ti.
Chhiatna thlenna hmun umzuina lam chu DM&R ngaichang chunga kalpui zel leh central sorkarah harsatna hrang hrangte report fel fai taka thehluh thuai ni se an ti a. Chhiatna thleng tam tak hi mihring siam atanga lo intan nia a lan thin avangin, he mi kawngah hian khauh leh zuala kal tha an tih thu leh chhanchhuahna lam thiam neih tam deuh deuh a tul thu an sawi.
He hunah hian Supply department hotute’n Monsoon Stock an nei zo fel hman a, engmah harsatna a thleng lo tura an ngaih thu an report a, Deputy Commissioner ten an district dinhmun report an pe bawk.
Thutkhawmah hian Home department Minister K. Sapdanga, PWD Minister Vanlalhlana, DM&R Minister Prof. Lalnilawma, P&E Minister F. Rodingliana te bakah sorkar mi pawimawhte an tel a. District tin bawrhsapten biakhmuh theih (video conference) hmangin an zawm a ni.
He huna tar lan a nih danin, DM&R-in report an dawn chinah hmun 211-ah leimin awmin, in chim 60 a awm a, in rauhsan 69 awmin, road block 83, retaining wall chim pali, electric ban tlu pakhat, lei tlahniam pahnih leh mitthi pali an awm. Tui lian report pawh a awm nual. Chhiatna thleng report hi thutkhawm lai ngei pawh hian a la awm belh a ni.
PWD enkawl kawng hi hmun 21 ah a block mek a. Serchhip, Thenzawl leh Sialsuk vela khualzin tangkhangte chhuah theihna turin chak taka hna thawh mek a ni.
Power & Electricity report danin, 33 KV Sub Station hi pasarih a chhia a. Mizoram pumpui hmun thuma thena hmun khat aia tam mahin harsatna an tawk mek. A siam that hna hi thawh reng a ni a, khua a that chuan ni hnih thum chhunga an siam vek theih an inbeisei.
PHE report dawn chinah, hmun 50 velah chhiatna report an dawng a. Kolasib tui pump khawl, Keitumah Solar Pump khawl leh Hnahthial pump te chu tuilianin a chim a. Line chhia hmun eng emaw zatah a awm.
Supply department lam chuan Monsoon Stock an nei zo fel hman a, engmah harsatna a thleng lo turah an ngai.