Aizawl: PWD Minister Vanlalhlana chuan eptu party-ten sorkar demna leh sawichhiatna tur ringawt zawng thin mah se, mipui thahnemngaite avangin chakna thar a neih leh thin thu a sawi.
ZPM-in nimina an party pisaah chhung inkhawm an nei a. He hunah thusawiin PWD Minister Vanlalhlana chuan, ZPM party hian mi mal leh ministry ang pawhin vawiin thlengin beihna an la tawk reng tih a sawiin, “Chhui chiana thu dik ni si lo, thudik hrula rin thu leh dawt tlem belhchhah hmangin mipui hnena hek kan tawk thin a. Chutih laia neutral mipuiin sorkar hmalakna leh theihtawp chhuaha kan thil tha tihte min hriatpui thu leh hmalam pana kal zel tura min fuihnate hian chakna thar min pe leh thin a ni,” a ti.
Mizoram hian motor kal theihna kawng, km 6610 a nei mek tih sawiin PWD Minister chuan, “He’ngte hi Mizoram sorkar leh NHIDCL ten enkawlin, PMGSY hnuaiah km 963 laih a ni a, Aizawl khawpuiah hian km 363 motor kal theihna kawng kan nei a ni. Aizawl hi kan khawpui ber leh kan ram hmel lanna a nih avangin ‘khawpui chhung kawngte hi a tha tur a ni’ tih hi sorkar ngaihdan a ni,” tiin, Zuangtuia PWD alkatra chhuanna khawl tihchhiat a ni a, engtikah nge hna an chhunzawm leh theih ang tih pawh hi sawi lawk theih ni lo mah se, sorkarin ngaihtuahna a seng leh mek thu a sawi.
Mipui pawh sorkar hmalakna tithuanawp zawnga hma la tawh lo tura ngenin Vanlalhlana chuan, “ALT road pawh tha taka siam turin ruahmanna kan nei mek a, Aizawl leh Thenzawl inkar kawng tha mah se, Thenzawl leh Lunglei Road inkar hi a harsa zual lai a ni a. Sorkar pawhin ngaihtuahna nasa zawk a seng mek a ni,” a ti.
PWD minister chuan state dangte hmasawnna hmuhin rualawh a na duh hle tih sawiin, “Kan ramah erawh economy-ah hmasawnin, lirtheite pawh lo pung zel mah se, kan khawpui chhung kawngte ruahmanna fel kan lo siam lo thin avangin traffic jam a nasa thin hle a, hei hian sorkar leh mipui tan harsatna lian tak a thlen nasa hle a. He’ng harsatnate sukiang tur hian theihtawpin ngaihtuahna kan seng,” tiin, sorkar hmasaten a ngaihna an hriat tawh loh hi Pathian rinchhan chungin hmalak dan kawng an dap mek thu a sawi.