Aizawl: June thla laihawl vela Sairang Rel Station hawn theiha peih beisei a ni a. Hemi atana Mizoram sorkar inbuatsaihna hmasa atan nimin khan Chief Minister Lalduhoma hovin Inner Line Permit (ILP) leh Railway Police chungchang sawihoin an thukhawm.
Chief minister pisa-a thutkhawmah hian ILP inkaihhruaina thlirletna leh a thar tihbelh tur rawtnate, online ILP Phase 2 kalpui dan tur te, permit-in a phal chin baka rei lo cham rute dapchhuahna leh Railway Police dinna tur chungchang te an sawi ho.
Home Secretary Vanlalmawia chuan online-a ILP kalpui mek dan chungchang a sawi fiah a, tihbelh emaw, siam that ngai emaw, district tina Bawrhsap atanga rawtna an dawn te pawh a sawi.
Online ILP portal kalpui dan hi Informatics Officer Lalrinfela chuan entirin, a kalpui dan tur tha zawk nia an ngaihte an sawiho nghal a. ILP hi online veka kalpui theih a la nih loh avangin hmun thenkhatah chuan tunhmaa kal dan (off line) anga kalpui a la ni.
DP&AR lamin a thuphungin Railway Police dinna hi a pawm tawh a, zirchianna neih chhoh mek a nih thu thutkhawmah hian sawi a ni bawk.
Thutkhawmah hian Home Minister K Sapdanga leh official-te an tel.
Sairang Rel Station hi June thla laihawl velah hawn theiha peih beisei a nih avangin, a rang lama hmalak a tul nia sawi a ni.