A thawh hnih nana Russia leh Ukraine inbiakna chuan rah tha tak a la chhuah leh chuang lo va, indona avanga mi an inmansak erawh inthleng leh turin an inrem thung.
Ukrainian aiawha inbiaknaa telte chuan Kyiv leh Europe leh US-a thawhpuiten an duh ber, ‘intiamkamna awm lova inkahhai puan’ chu Russia hian a hnawl leh niin an sawi.
Russian team hian indona laia ‘hmun pawimawh bikah’ ni hnih thum chhung inkahhai puan an rawt tih an sawi thung a, a bak engmah an sawi lo.
Thawhtannia Turkish khawpui pakhat, Istanbul-a inbiakna hian darkar khat chuang hret a awh a, indonaa mi an inmansak zinga kum 25 hnuai lam, damlo leh hliam na zual turte inthleng turin an remti dun.
Russia hian Ukraine hi February, 2022 atang khan rûnin an chet dan enin indo tihtawp mai duh anga an lan loh em avangin an inbiak hma atang tawhin thil ropui tak an sawi chhuah rin lohna a lian sa.
Moscow hian Ukrainian ram 20% chuang mah a luahsak tawh a, heng zingah hian kum 2014 atanga a luahsak tawh, Crimea peninsula chhim lam pawh a tel.
An inbiak zawhah Ukrainian Defence Minister Rustem Umerov, an ram aiawhte hruaitu chuan Ukraine chuan ‘thihna thleng titawp nghal turin intiamkamna engmah awm lova inkahhai vek’ an duh tih a sawi.
Ukraine hian inkahhai rawtna hi ‘ni rei vak lo’ liam taah khan Russia hnenah an hlan tawh tih a sawi a; mahse, Moscow hian rawtna an neih an sawi lawk ve lo va, Istanbul-a an inbiaknaah an pharh chawp chauh niin a sawi.
Ukrainian Deputy Foreign Minister Serhiy Kyslytsia pawhin Russia hian intiamkamna awm lova inkahhai rawtna chu an hnawl niin a sawi ve bawk.
Ukraine aiawha telte hian Russia hian June thla tawp hmaa an rawtna an chhan an beisei a, chu chu hmaichhana Ukrainian President Volodymyr Zelensky leh Russian President Vladimir Putin an inbiak theihna tura pawimawh niin an sawi.
A hnu lawka Russian aiawhte hotu, Vladimir Medinsky-a’n thuthar la khawmtute a kawmnaah mi tang inthleng tura an pawm thu hi a sawi ve thung a. A hun leh ni leh engtia kalpui tur nge tih erawh a sawi lo.
Medinsky-a hian Russia chuan Kyiv hnenah Ukrainian sipai ruang 6,000 a hlan dawn tih a sawi bawk.
Ram pahnihte hi May 16 khan a vawi khat nan an lo inbe tawh a, indo titawp tura ngaihdan an neih inang lovin an inthathen a, mi tang erawh 1,000 ve ve an inthleng.
President Zelensky-a leh a European thawhpuite chuan Russia hian Ukrainian ram a lak zel theih nan rilru nei takin inkahhai hi kalpui a duh lo niin an puh.
Inremna duh ve tho, US President Donald Trump-a pawhin Russia chu thil a tikhawtlai zel a nih chuan na zawka hrekah a vau.