Aizawl: Tun dinhmunah 33kV North Bukpui Sub Station tih lohah Sub-Station zawng zawng atangin power an dawng kim tawh a; Aizawl khawpui bikah khaw chhia leh harsatna dang a awm loh chuan vawiin hian kawlphetha pek kim theih beisei a ni.
Thawhlehni khan P&E Minister F Rodingliana hovin a pisa-ah department hotute chuan tun hnaia ruahsur nasain district hrang hranga kawlphetha pekna chhia siamthat hna thawh mek an thlir ho a. He huna tar lan a nih danin, tun dinhmunah 33kV North Bukpui Sub Station tih lohah chuan Sub-Station zawng zawng atangin power an dawng kim tawh a. North Bukpui Sub-Station pekna line pawh check mek niin, reiloteah power pekchhuah theih beisei a ni. Khaw thenkhat power supply pekchhawnna feeder thenkhat line chhia awmte pawh a tahtawlin siamthat mek zel a ni.
Distribution transformer chhiate pawh thlak mek zel a ni a, niminah ringawt pawh transformer panga pekchhuah thu tar lan.
Aizawl khawpui bikah khaw chhia leh harsatna dang a awmloh chuan June 4, 2025 hi chuan power pek kim theih beisei a ni a. Chawnpui Sub-Station atanga Aizawl West lama power pekna, a bikin Dinthar Veng, Tuikual leh Dawrpui Vengtharte chawmtu line, tunhnaia chhe zing bik chu tihziaawmna turin a ranglama hmalak rel ni se tih a ni. Hna hmasaah feeder pumpui shutdown lak ngai lova a chhe lai te thliar hran zung zung theihna turin Line Gang vuah ni se an ti bawk.
Hetihlai hian Union Power Minister in P&E Minister F. Rodingliana hnena August 5, 2024-a alo tiam, Zuangtui leh Bukpui inkar 132 KV line load tam zawk keng thei HTLS conductor-a thlakna tur leh Mizoram chhung hmun hrang hrang a sub-station pasarih (Bawktlang, Saitual, Melriat, Khawzawl, Champhai, Serchhip Bukpui, East Lungdar) Transformer lian zawk dahna tur Rs vbc 47.87 chu DONER-in an sanction fel.