Richard Gasquet chuan kar kal ta Ningania French Open second round-ah Jannik Sinner a hneh loh rualin kum 23 zet a lo luhchilh tawh tennis khawvel a chawlhsan.
Second round an khelhah hian top seed Sinner chuan Gasquet hi 6-3, 6-0, 6-4-in a hneh a. An inkhelh zawhah hian Court Philippe-Chatrier ah Gasquet thlahna hun an hmang a, hetah hian trophy an hlan bakah standing ovation nen an thlah.
Kum 38 mi, Gasquet chuan a hmain Roland-Garros chu a tournament khelh hnuhnun ber tur a nih thu hi a lo sawi tawh a ni.
Gasquet chuan, “Hetiang tluka duhthusam match hnuhnung khelh tur hi a awm chuang lo ang. Ka dam chhung hi chuan tennis hi ka hmangaih reng dawn a ni,” a ti.
Rafael Nadal pawhin Gasquet chu social media-ah thlahna leh zahna thu a hlan nasa hle a. Instagram-ah phei chuan an pahniha thla an lak dun thahnem tak a tar chhuak.
Nadal chuan, “Naupang kan nih lai atang tawhin kan inkawp nasa em em a, court chhung leh pawnah pawh kan inzui nasa a, chanchin kan nei hnem hle. Tournament za chuang kan khel a, khaw hrang hrangah kan inkhel kual nasa a, match pawh kan khel hnem teh e,” tiin a ziak.
“I vanglaiin i thiamna hi khawvel huapa hriat hlawh khawpin a lang chhuak a, vawiinah hian hmun ropui tak, Roland-Garros-ah ngei mai tennis khelh i chawlhsan thei hi ka lawmpui tak zet che a. I hma lam hunah duhsakna ka hlan a che,” a ti bawk.
French tennis player Gasquet hian kum 2007-ah khan No. 7 nihna a chelh thei a, hei hi a vanglaia a thlen san ber niin, Grand Slam semi final vawi thum a lut a, Wimbledon-ah vawi hnih lutin, US Open ah vawi khat a lut bawk a, Grand Slam final erawh a lut ta lo.
ATP title vawi 16 a la a, kum 2017-a Davis Cup champion ni thei, French team-ah pawh khan a tel.
Kum 2002 atanga tennis khel tan, Gasquet hian vawi 1,000 chuang a khel a, French Open bikah vawi 22 a tel hman.