Aizawl: Synod Revival Camping Centre (SRCC), Sihphir Neihbawih a ruihhlo ngai te puala Chhanchhuahna Camping neih mek chu nimin khan Excise Minister Lalnghinglova Hmar chuan a tlawh a, camping buaipuitute nen an inkawm bakah camping kaihhnawih a tul apianga hman turin sum fai a hlan.
Excise Minister Lalnghinglova Hmar chuan ruihhlo ngaite puala camping buatsaihtute hmalakna fakawm a tih thu a sawi a. “Ruihhlo do kawngah sorkar leh khawtlangin theihtawp a chhuah chungin, kohhran a tel chuan lian zawk leh awmze nei zawkin hma a lak theih thin a ni,” a ti.
Tuna camping boruak atangin ruihhlo ngai chhanchhuah an mamawh zia a lang chiang hle a, kohhran pawhin thildang thlauhthla chuang lovin helam hawi telh telh se a duh thu a sawi bawk.
Minister hi Synod Revival Committee Director Rev. JC Lalramliana, Synod Revival Committee member Rev. F. Lalrinnunga leh Upa Lalmuana, Camp Director ten an lo dawngsawng.
Camper-te chu an chhuahna tur zawnsak vek tum a nih thu leh, an chhuah hnuah pawh in lama tlawh chhuah vek tum a nih thu an sawi a ni. Chawlhkar thar Thawhlehni atangin follow up camping neih tum a nih thu an sawi bawk.
Chhanchhuahna camping-ah hian camper tam laiin mi 1005 an tling a. Synod RCC-ah hian tun dinhmunah mi 120 awm mekin, camper-te hi kum 18-67 inkar te an ni.
May 5, 2025 khan lutin vawiin hian an chhuak ang. SRCC bakah hian Youth Recreation Centre, Falkland-ah Chhanchhuahna camping hi kalpui niin, mi 112 an awm mek bawk. Camping buatsaih nan Rs. nuai 40 vel sen tawh a ni.
Excise Minister hi Z. Lalhmangaiha, Commissioner, Excise & Narcotics Department in a tawiawm a ni.